6 iyun 2013 00:54
Caspian Cup turnirinin ən yaxşı oyunçuları açıqlandı
AFFA-nın təşkilatçılığı ilə keçirilən III Caspian Cup beynəlxalq turnirinə bu gün yekun vurulub. Azerisport.az xəbər verir ki, III yer uğrunda oyunda Gürcüstan və Yaponiya yığmaları qarşılaşıb. Penalti seriyasında 5:3 hesabı ilə qalib gələn yaponiyalı futbolçular üçüncü yeri tutub.
Final oyununda Azərbaycan və Türkiyə yığmaları üz-üzə gəlib. 4:1 hesabı ilə qələbə qazanan Türkiyə yığması III Caspian Cup beynəlxalq turnirinin qalibi olub.
Final qarşılaşması başa çatdıqdan sonra mükafatlandırma mərasimi keçirilib. Mükafatları AFFA-nın baş katibi Elxan Məmmədov, AccessBank-ın İdarə Heyətinin sədri Mixael Hoffmann və Regional Futbol Federasiyaları İctimai Birliyinin prezidenti İsgəndər Cavadov təqdim edib.
Əvvəlcə final oyununu idarə etmiş hakimlərə xatirə hədiyyələri və diplom verilib.
Uruqvay yığması turnirin Fair Play mükafatına layiq görülüb.
"Ən yaxşı qapıçı" nominasiyasının qalibi Türkiyə yığmasının üzvü Tarık Çetin olub.
Rəqib qapılarından 7 top keçirmiş ABŞ komandasının futbolçusu Bruks Lennon yarışın ən məhsuldar oyunçusu üçün təsis olunmuş mükafatı alıb.
Turnirin "Ən yaxşı oyunçu"su mükafatına Türkiyə yığmasının üzvü Enes Ünal layiq görülüb.
Yaponiya yığmasının üzvləri bürünc, Azərbaycan komandasının futbolçuları isə gümüş medallarla təltif edilib.
Sonda III Caspian Cup turnirinin kuboku Türkiyə yığma komandasına təqdim olunub.
