6 iyun 2013 12:32
AFFA prezidenti: Türkiyə Super Kubok matçından imtina etməyimizin yeganə səbəbi....
AFFA prezidenti Rövnəq Abdullayev Türkiyə Futbol Federasiyanın Super Kubok oyununun Azərbaycanda keçirilməsi ilə bağlı müraciətinə mənfi cavab vermələrini şərh edib. Azerisport.az Anadolu agentliyinə istinadən xəbər verir ki, Abdullayev avqustun 11-də Tofiq Bəhramov adına Respublika Stadionunda Azərbaycan komandalarının oynayacaqlarını bildirib:
“Öz klublarımız üçün stadionun hazırlanması və oyuna hazırlıq məsələsi gündəmə gəldiyi üçün məcburən Türkiyəyə mənfi cavab verdik. Bu qərarımıza görə “Azərbaycan Türkiyəyə rədd qərarı verdi” ifadəsi çox ağır oldu”.
Super Kubokun oynanacağı gün xeyli sayda Azərbaycana “Galatasaray” və “Fenerbahçe” tərəfdarlarının gələcəyi, təhlükəsizlik probleminin olması və buna görə də Azərbaycanın rədd cavabı verməsi məsələsinə də toxunan Rövnəq Abdallayev bu iddiaları rədd edib: “Galatasaray” və “Fenerbahçe” klublarının əzəli rəqabətindən və bu rəqabətin azarkeşlərə necə təsir etdiyindən xəbərdarıq. Amma bizim qərarımızla bunun heç bir əlaqəsi yoxdu. Təhlükəsizlik məsələsi ilə bağlı Azərbaycanın problemi yoxdu. Yeganə səbəb odur ki, öz komandalarımız həmin gün qarşı-qarşıya gələcək və bu da Super Kubokun oynanacağı günlə üst-üstə düşür”.
Qeyd edək ki, Türkiyə Futbol Federasiyası Super Kubok matçının Azərbaycada keçirilməsi üçün AFFA-ya müraciət etmişdi. Lakin Azərbaycan tərəfi bu görüşü təşkil etməkdən rəsmən boyun qaçırdı.
