6 iyun 2013 13:06
Yığmamız FİFA reytinqində irəlilədi
FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni açıqlanan siyahıda iki pillə irəliləyib.
Belə ki, Berti Foqtsun çalışdırdığı komandamız indi 118-ci pillədə qərarlaşıb. Komandamızın hesabında hazırda 291 (ötən ay 276 idi – azerisport.az) reytinq xalı var. Yəni, ötən ayla müqayisədə millimizin həm reytinq xalında, həm də qərarlaşdığı pillədə bir qədər dəyişiklik olub.
DÇ-2014-ün seçmə mərhələsində yığmamızın rəqiblərindən olan komandalar arasında yalnız Lüksemburqu qabaqlayırıq. Bu komanda üç pillə irəliləyib və hazırda 186 xalla 145-ci yerdə gedir. Şimali İrlandiya da 3 pillə irəliləyib. İrlandlar hazırda 304 xalla yığmamızdan iki pillə öndə - 116-cı sırada qərarlaşıblar. Bir pillə geriləyən Portuqaliya 1137 xalla altıncı pillədədi. Rusiya 1059 xalla 11-ci yerdədi. İsrail isə 3 pillə geriləyib. Bu ölkənin millisi 540 xalla 62-ci yerdə gedir.
Reytinq siyahısının ilk onluğunda isə vəziyyət belədi: 1. İspaniya (1614 xal), 2. Almaniya (1416), 3. Argentina (1287), 4. Xorvatiya (1222), 5. Hollandiya (1158), 6. Portuqaliya (1137), 7. Kolumbiya (1123), 8. İtaliya (1097), 9. İngiltərə (1095), 10. Ekvador (1066).
Qeyd edək ki, növbəti reytinq cədvəli iyulun 4-də açıqlanacaq.
