7 iyun 2013 19:15
“Nə qədər zəif rəqiblə düşsək, bir o qədər də yaxşı olar”
"İnter"in yarımmüdafiəçisi Asif Məmmədov klub saytına müsahibə verib. Azerisport.az xəbər verir ki, futbolçu istirahəti necə keçirdiyi barədə danışıb, toplanışın gedişi haqqında söhbət açıb və komandanın Avroliqadaki şanslarını dəyərləndirib.
- Çətin mövsümdən sonra futbolçulara istirahət üçün 10 gün vaxt verilmişdi. Bu müddət ərzində yorğunluğu ala bildinizmi? Ümumiyyətlə, necə və harada istirahət etdiniz?
- Yaxşı dincəldim. Ailəmlə birgə istirahət etmişəm. Azərbaycanın rayonlarını, gözəl məkanlarını gəzdik, qohumlara baş çəkdik və daha sonra Bakıya qayıtdıq. Ona baxmayaraq ki, istirahət üçün az vaxtımız var idi, yaxşı istirahət edə bilmişəm. Əsas isə bizim işimizdi. İndi biz toplanış keçirməliyik və bunu gözəl başa düşürük.
- Artıq bir neçə gündü Türkiyədəsiz. Toplanışın gedişi haqqında nə deyə bilərsiniz?
- Biz çox dincəlməmişik deyə, toplanış da ağır keçmir. Az istirhət etmişik, ona görə də məşqlərə başlamaq elə də çətin olmadı. Özümüzü yorğun hiss etmirik. Toplanış yaxşı keçir, uşaqlar özlərini yaxşı hiss edirlər. Hər şey yaxşı gedir.
- Adətən ilk toplanış futbolçular üçün daha çətin olur. Ona görə ki, oyunçular əsasən fiziki xarakterli məşqlər keçirlər...
- Bir az əvvəl dediyim kimi, biz az istirahət etmişik, ona görə də məşqlərə qayıtmaq elə də çətin olmadı. Məşqlərdəki çalışmalar mənə ağır gəlmir. Başqa toplanışlara baxanda, hansılarda ki, iki-üç məşqdən sonra ayaqlarda yorğunluq başlayırdı və yerimək belə çətin idi, bu toplanış isə başqadı. Az dincəlmişik deyə, həmin çətinliklərlə üzləşmirik.
- Qarşıda "İnter"i Avropa Liqasında çıxış gözləyir. Sizin fikirinizcə, komanda bu yarışda özünü yaxşı tərəfdən göstərə biləcək?
- Təbii ki, biz özümüzü yaxşı tərəfdən göstərməyə çalışacağıq. Yaxşı nəticələr qazanmaq istəyirik. Komandamızı çox futbolçu tərk edib və onların əvəzinə gələcək oyunçulardan da çox şey asılıdı. Onlar özlərini yaxşı tərəfdən göstərməlidilər. İstərdim ki, onlar komandaya tez adaptasiya olsunlar və komandaya qısa müddət ərzində xeyir versinlər. O halda Avroliqadakı oyunumuzu göstərib, uğur qazana biləcəyik. İki-üç mərhələ keçə bilərik, daha sonra isə çox şey püşkdən asıllıdı, görək qismətimizə hansı rəqib düşür.
- Yeri gəlmişkən, turnirin birinci mərhələsində bütün potensial rəqiblərin adları da artıq məlumdu. Bilmək istərdik, bu klublardan hansını "İnter" üçün daha münasib rəqib hesab edirsiniz?
- Zənnimcə, biz birinci mərhələdəki bütün rəqibləri məğlub etməyə borcluyuq. Bununla belə, etiraf etməliyəm ki, nə qədər zəif rəqib düşsə, bir o qədər də yaxşı olar. Ona görə ki, "İnter"ə yeni futbolçular gələcək və onların komandada uyğunlaşması, öz yerləni tapması üçün vaxt lazım olacaq. Ən azından ikinci mərhələyə kimi onlar komandada özlərini rahat hiss eləməlidilər.
