11 iyun 2013 16:07
AFFA Foqtsa əvəzləyici axtarmağa avqust ayından başlayacaq
Futbol üzrə Azərbaycan yığması AÇ-2016-nın seçmə mərhələsinə yeni baş məşqçiylə başlaya bilər. Azerisport.az xəbər verir ki, AFFA DÇ-2014-ün seçmə mərhələsi başa çatan kimi, almaniyalı mütəxəssislə yolları ayırmağa hazırlaşır. Futbol qurumu 2008-ci ilin aprel ayından millimizi çalışdıran Foqtsa əvəzləyici axtarmağa avqust ayından başlayacaq.
Qeyd edək ki, Foqtsun rəhbərliyi altında Azərbaycan yığması artıq üçüncü seçmə tsiklini keçirir. Onlardan birinci DÇ-2010-un seçmə mərhələsi çərçivəsində baş tutdu ki, yığmamız 5 xal toplaya bildi və yalnız Lixtenşteyni qabaqladı. AÇ-2012-nin seçmə mərhələsində isə komandamız Qazaxıstan yığmasını qabaqlamaqla yanaşı rekord sayda – 7 xal toplamış oldu.
Bu seçmə mərhələdə isə komandamız hələlik yalnız güclü rəqiblərinə - Rusiya və Portuqaliyaya uduzsa da, nisbətən zəif komandalara da qalib gələ bilmədi və azarkeşlər az qala hər oyunda Foqtsun istefasını tələb etdilər. Yığmamız İsraillə evdə, Şimali İrlandiya ilə səfərdə heç-heçə etdi ki, bunu əslində normal nəticə saymaq olardı. Baxmayaraq ki, hər iki görüşdə komandamız qələbəyə çox yaxın idi. Amma Lüksemburqla həm səfər, həm də ev oyunundakı heç-heçələr Foqtslu milliyə qarşı narazılıqları daha da artırdı. Axı hələ seçmə mərhələnin startı ərəfəsində biz məhz “cırtdan ölkə” təmsilçisinə 6 xal mənbəyi kimi baxırdıq.
Tam təsdiqlənməsə də, əldə etdiyimiz son məlumatlara görə, AFFA artıq bu uğursuzluqların fonunda yığmada dəyişikliklər etməyə qərar verib. Yəqin ki, artıq futbol başbilənlərimiz də Foqtslu yığmada ciddi irəliləyiş olmadığını başa düşüblər və onunla yola davam etməyin mənasız olduğunu anlayırlar. Hər halda almaniyalı mütəxəssis geridə qalan beş ildə bütün bacarığını ortaya qoydu və bundanartığına nail olacağı inandırıcı görünmür. Nəzərə almaq lazımdı ki, bir məşqçinin özünü sübut etməsi üçün beş il kifayət qədər normal vaxtdı və Foqts artıq limiti keçmək üzrədi.
Foqtsun əvəzləyəcisini axtarmağa avqust ayından başlanılması isə AFFA-nın hadisələri qabaqlamaq istəməməsi ilə əlaqədardı. Böyük ehtimalla yeni baş məşqçi də əcnəbi olacaq. Amma hələlik namizədlərin kimliyi tam dəqiqləşməyib və bu barədə heç bir məlumat yoxdu.
Sonda onu da bildirək ki, AFFA-dan bu informasiyaya heç bir münasibət bildirmək istəmədilər.
