12 iyun 2013 17:10
Bakının meneceri dünya mediasının diqqət mərkəzində (VİDEO)
“Bakı” futbol klubunun meneceri Vüqar Hüseynzadə “Football manager” interaktiv simualyatorunun yaradıcılarının dəvəti ilə Londonda səfərdə olub. Azerisport.az xəbər verir ki, səfər zamanı Vüqar Hüseynzadə bir neçə nüfuzlu media agentliklərinə müsahibə verib.
Onların sırasında ESPN, New York Times və BBC kimi tanınmış media mənbələrini qeyd etmək olar.
BBC-nin “Talk Sport” verilişinin efirində səslənən tanınmış “Hawksbee and Jacobs” şousunun qonağı olan menecerimizin iştiraki ilə yayımlanan verilişi FC Baku TV-nin təqdimatında dinləyə bilərsiniz.
"Bakı" futbol klubunun gənc meneceri Vüqar Hüseynzadə futbola olan marağından və klubumuzda çalışdığı müddət ərzində gördükləri, inkişafda olan Azərbaycan futbolu haqqında fikirlərini səsləndirib.
15 yaşında ikən "Bakı"nın UEFA Çempionlar Liqası təsnifat mərhələsində Litvanın "Ekranas" klubuna qarşı keçirdiyi səfər oyununu izləmək məqsədi ilə Panavejisə yollanan Vüqar burada klub prezidenti Hafiz Məmmədovla baş tutan tanışlığından danışıb. Futbola böyük marağı olduğunu və klubda çalışmaq arzusunu bildirən Vüqar bu təklifinin klub prezidenti tərəfindən maraqla qarşılandığını və təhsilini bitirdikdən sond Bakıya dəvət aldığını söyləyib.
Football Manacer interaktiv futbol simulyatorunun köməyi ilə klub menecerliyi sahəsində nəzəri biliklərə sahib olan Vüqar hazırda bacarığını təcrübi olaraq tətbiq edir.
Azərbaycanda futbol idarəçiliyinin bir qədər fərqli olduğunu, klub meneceri və baş məşqçi funksiyalarının müxtəlif şəxslər tədəfindən icra olunduğunu bildirir. Football Manacerin qlobal futbol dünyası, futbol idarəçiliyi sahəsində ona misilisiz imkanlar yaratdığını vurğulayan 21 yaşlı menecer bu biliklərinin gündəlik işlərində ona yardımçı olduğunu söyləyir.
Azərbaycanda futbolun sürətlə inkişaf etdiyini qeyd edən Vüqar Hüseynzadə Azərbaycan Premyer Liqasının səviyyəsinin ildən-ilə yüksəldiyini, "Bakı" futbol klubunun bu sahədə lider mövqelərdə olduğunu bildirib. Sabit maliyyə dayaqlarında malik olan "Bakı" futbol klubunun uşaq futboluna xüsusi diqqət ayırdığını, bu sahədə klubumuzun uğurlar qazandığını diqqətə çatdırıb. "Bakı" futbol klubunun akademiyasının 2011-ci ildə Avropa Klublar Birliyinin (ECA) xüsusi mükafatına layıq görüldüyünü xatırladan gənc menecer istedadlı gənclərin yetişdiyini və bu oyunçuların ölkə futboluna xidmət edəcəyinə əmin olduğunu bildirib.
Azərbaycanda Toni Adams, Con Toşak kimi tanınmış futbol mütəxəssislərinin çalışdığını nümunə gətirən Vüqar bunun Azərbaycan futboluna artan marağın nəticəsi kimi dəyərləndirib.
"Bakı" futbol klubunun 2 dəfə ölkə çempionu titulu, 3 dəfə isə Azərbaycan kubokunu qazandığını və klubun həmişə iddialı olduğunu açıqlayan menecer yaxın illərdə klubumuzun daha yüksək səviyyəyə yüksələcəyinə əmin olduğunu bildirib. Klubumuzun beynəlxalq əlaqələrinə toxunan Vüqar gənc futbolçularımızın yetişib-püxtələşməsi baxımından böyük klublarla əməkdaşlığın zəruri olduğunu və klub prezidenti Hafiz Məmmədovun Azərbaycan futbolunun inkişafı naminə gördüyü işlərdən söhbət açıb.
