17 iyun 2013 19:49
Qarabağın düşərgəsində iki yeni futbolçu
Avropa Liqasının hazırlığını Türkiyədə davam etdirən “Qarabağ”ın düşərgəsinə iki yeni futbolçu qoşulub. Azerisport.az xəbər verir ki, onlardan biri Gürcüstan millisinin üzvü, 27 yaşlı Nikolas Gelaşvilidi.
27 yaşlı oyunçunu “İmarət” fan-klubunun üzvləri qarşılayıb və “Qarabağ”ın oyunçusu kimi ilk fotosunu çəkiblər. Onunla iki illik müqavilə imzalanacaq.
Qeyd edək ki, Nikolas karyerasına Gürcüstanın “VİT-Georgia” klubunda başlayıb (2003-2004, 6 oyun). Daha sonra “Kaxeti”də (2004-2005, 28 oyun, 8 qol) çıxış edən Qelaşvili 2005-ci ildə “VİT-Georgia”ya dönüb (2005-2007, 51 oyun, 25 qol). 2008-2012-ci illərdə “Zestafoni”nin əsas (105 oyun, 63 qol) və əvəzeidici komandasında (3 oyun, 1 qol) çıxış edən forvard 2012-ci ildə Almaniyanın “Bohum” klubuna keçib və II Bundesliqada 25 oyunda 2 qola imza atıb. O, bundan başqa “Bohum”un ikinci komandasının heyətində Regional Liqada 2 oyuna çıxıb.
Nikolas 2005-2006-cı illərdə Gürcüstan U-21-nə (7 oyun, 1 qol), 2007-ci ildən A milliyə dəvət alıb. Qətərlə oyunda debüt edən Qelaşvili 11 dəfə milli formanı geyib. Baş məşqçi Timuri Ketsbaya onu iyunun 2-də və 5-də İrlandiya və Danimarka ilə oyunlara dəvət edib. İrlandiyaya qarşı 61 dəqiqə oynayan Nikolas Danimarka matçının 87-ci dəqiqəsində meydana çıxıb.
Digər futbolçu isə Konqo əsilli hücumçu Ulriç Kapolonqodu. 24 yaşlı hücumçu komandada baxışdadı. Məşqçi heyətinin ümidlərini doğruldacağı halda, onunla müqavilə imzalanacaq. Qeyd edək ki, Kapolonqonun son klubu İordaniyanın Şabab Al Ordo komandası olub.
