18 iyun 2013 00:24
Con Toşak üç mövqeyə altı futbolçu istəyir
Bu gün istirahətdən qayıdaraq Bakıda bir araya gələcək “Xəzər Lənkəran” ertəsi gün təlim-məşq toplanışı keçmək üçün Almaniyaya yollanacaq. Azerisport.az xəbər verir ki, Con Bencamin Toşakın istəyinə uyğun olaraq komandaya yeni transferlərin cəlb edilməsi də məhz toplantının gedişində baş tutacaq.
Baxışa futbolçu gətirilməsinin əleyhinə olan uelsli çalışdırıcı yalnız tanıdığı və öncədən oyununu izlədiyi futbolçuların birbaşa müqaviləyə dəvət olunmasının tərəfdarıdı. Bu səbəbdən də o toplanış çərçivəsində yoxlama oyunlarını sayca azaltmağa qərar verərək matçların sayını 2-yə endirib. Almaniya toplanışında komandanın heyətinə 3 mövqe üzrə 6 futbolçu (onlardan yalnız biri Azərbaycanlı futbolçu, digərləri isə legionerlər olacaq) qatmaq niyyətində olan Con Toşakın gözaltı etdiyi futbolçular var.
Belə ki, 64-yaşlı mütəxəssis Barselonada istirahət edərkən bir neçə futbolçu ilə şəxsən söhbət edib. Yüksək fərdi ustalıq səviyyəsinə malik, daha çox çevikliyi ilə seçilən və eyni zamanda da kollektiv oyuna üstünlük verərək, fəallığı ilə gözə dəyən iki səviyyəli futbolçuyla artıq şifahi razılaşmaya nail olan Toşak bu futbolçuların adlarını telefon danışığında klub rəhbərliyinə açıqlayaraq müsbət cavab alıb. Azad agent statusuna sahib olan həmin futbolçuların “Xəzər Lənkəran”la bağlayacaqları müqavilələrin dəyərinin milyon avro ilə ölçüldüyünü də qeyd edək. (12-ci oyunçu)
