17 iyun 2013 13:37
Neftçi braziliyalı futbolçu ilə iki illik müqavilə imzalayacaq
Xəbər verdiyimiz kimi, Azərbaycan çempionu “Neftçi” ilk transferini gerçəkləşdirib. Azerisport.az xəbər verir ki, çempion 29 yaşlı Karlos Kardosonu rənglərinə bağlayıb.
Paytaxt klubu bu gün tam adı Karlos Alexandre Kardoso olan braziliyalı futbolçu ilə iki illik müqavilə imzalayacaq.
Qeyd edək ki, ampluaca müdafiəçi olan Kardoso peşəkar karyerasına yerli “Komersial”da başlayıb. 2003-2006-cı illərdə bu komandanın uğurları üçün tər tökən futbolçu ardından Portuqaliya “Eştrela”sı ilə anlaşıb. “Üçrənglilər”in formasında 2006-2008 aralığında 8 matça çıxan cənubi amerikalı 1 dəfə rəqib qapılarına yol tapıb. Ardından Rumıniya “Panduri”sinə keçən Kardoso yeni komandasının simvollarından birinə çevrilib.
“Panduri”də kapitan sarğısını daşıyan müdafiəçi “şaxtaçılar”ın heyətində 106 oyuna çıxıb və bu müddətdə 7 dəfə rəqib qapılarına yol tapıb. 2012-ci ilin yayında Vladiqafqaz “Alanıya”sına yetərincə samballı qiymətə transfer olunan braziliyalı şəhərdəki ümumi duruma uyğunlaşa bilmədiyi üçün rəhbərliyə müraciət edərək, formasında 8 matça çıxdığı Rusiya klubundan getmək istədiyini bildirib və vətəninə dönərək A seriyasında çıxış edən “Vitoria”ya pənah aparıb. Solaxay mərkəz müdafiəçisi həm müdafiənin cinahlarında, həm də dayaq yarımmüdafiəçisi mövqeyində oynamaq bacarığı ilə seçilir.
