18 iyun 2013 13:33
Azərbaycan millisinin daha bir üzvü Xəzər Lənkəranda!
“Xəzər Lənkəran” futbol üzrə Azərbaycan yığmasının daha bir hücumçusunu heyətinə qatmağa yaxındı. Azerisport.az xəbər verir ki, cənub klubu “Sumqayıt”da forma geyən Pərdis Fərcad-Azadla danışıqlar aparır.
25 yaşlı futbolçunun yaxın günlərdə “ağ-yaşıllar”la müqavilə bağlaması gözlənilir. Cənub təmsilçisi bu transferi mümkün qədər tez rəsmiləşdirmək istəyir ki, millimizin üzvü komandanın bu gündən başlayacaq Almaniya toplanışına da vaxtında qoşulsun və “Xəzər Lənkəran”ın Avropa Liqasındakı oyunlarına qədər tam hazır olsun.
Tərəflərin iki illik müqavilə ilə bağlı ilkin razılığa gəldiyini də qeyd edək. İndi sadəcə “Xəzər Lənkəran”ın bu transferə görə “Sumqayıt”la razılığa gəlməsi qalıb.
Qeyd edək ki, “Xəzər Lənkəran” artıq AZAL-dan Junior Nildo və Zohair Benuahini, “Simurq”dan Rasim Ramaldanovu, eləcə də Nikola Qliqorovu (Alki, Kipr) heyətinə qatıb. Almaniya toplanışı zamanı isə daha bir neçə legioner futbolçu ilə müqavilə imzalanması gözlənilir.
