21 iyun 2013 12:54
Neftçi holland hücumçu alır (FOTO)
Avstriyada təlim-məşq toplanışında olan “Neftçi” Hollandiyadan hücumçu transfer edə bilər. Azerisport.az xəbər verir ki, bu barədə “The Telegraph” nəşri məlumat yayıb.
Məlumatda bildirilir ki, paytaxt klubu “Nijmegen”in hücumçusu Melvin Platjeyə maraq göstərir.
Artıq futbolçu ilə danışıqlar baş tutub. Qəzet son Azərbaycan çempionunun Platjendən bu gün üçün qəti cavab gözlədiyini yazıb.
Qeyd edək ki, 24 yaşlı Platjenin NEK-lə 2014-cü ilin iyun ayına qədər müqaviləsi var. O, 2011/12 mövsümündə çıxdığı 52 oyundan 13 qol vurub. Ötən mövsüm isə “Nijmegen”in yeni baş məşqçisi Aleks Pastoorla problemi yarandığı üçün əsas heyətdə yerini itirib. 2007-2011-ci illər aralığında isə o, “Volendam”da çıxdığı 100 oyunda 43 qola imza atıb.
Xatırladaq ki, Nikolas Kanalesin gedişindən sonra “Neftçi”də hücumçu problemi yaranıb. Klub rəhbərliyi Çempionlar Liqasının oyununa qədər yeni əcnəbi forvard alacağını bəyan edib.
