24 iyun 2013 16:54
Neftçinin rəqibini yaxından tanıyaq
Bu gün UEFA Çempionlar Liqasının ikinci təsnifat mərhələsinin püşkü alıtdı. Azerisport.az xəbər verir ki, mübarizəyə ikinci mərhələdən başlayacaq Azərbaycan çempionu “Neftçi” Albaniyanın “Skenderbeu” klubuna rəqib oldu.
“Skenderbeu” futbol klubu 1909-cu ilin 15 aprelində Albaniyanın Korçe şəhərində siyasətçi və şair Hile Mosi tərəfindən “Vllazeriya” adı altında yaradılıb. Klub 1925-ci ildə “Skenderbeu” adlandırılıb. “Neftçi”nin rəqibi Albaniyanın tarixi qəhrəmanı Skanderbeqin (İsgəndər bəy) adını daşıyır.
“Skenderbeu” başa çatan mövsümdə Albaniya çempionu olub. Komanda keçirdiyi 26 oyunda 18 qələbə qazanıb, 4 heç-heçə edib, 4 dəfə məğlub olub və 58 xalla ən yaxın izləyicisini 6 xal qabaqlayıb (top fərqi – 43-14).
“Skenderbeu” “Neftçi” kimi ardıcıl üçüncü mövsümdü çempionluğu heç kimə vermir. Komanda 2010/11, 2011/12 və 2012/13 mövsümlərində qızıl medallara sahib çıxıb. “Skenderbeu” ilk çempionluğunu 1933-cü ildə qazanıb və ondan sonra 74 il birinciliyə həsrət qalıb.
“Neftçi”nin rəqibi 1976, 2005 və 2007-ci illərdə Albaniya I divizionunun, 1958, 1965, 1976 və 2012-ci ölkə kubokunun, 2011 və 2012-də isə Super Kubokun qalibi olub.
“Skenderbeu” Çempionlar Liqasında heç vaxt mərhələ adlaya bilməyib. 2011/12 mövsümündə APOEL-ə hər iki oyunda uduzan (0:2, 0:4) komanda ötən mövsüm ilk oyunda yendiyi (1:0) “Debretsen”ə cavab matçında uduzub (0:3).
Klubun prezidenti Adrian Takay, baş məşqçisi Mirel Yosadı. “Skenderbeu”nun heyətində Albaniya yığmasının üzvləri çıxış edir. Komandada 7 legioner var. Onlar Nigeriya, Mali, Braziliya, Xorvatiya və Serbiya vətəndaşlarıdı.
“Neftçi”nin rəqibi ev oyunlarını Korçe şəhərindəki 12 min azarkeş tutumuna malik “Skenderbeu” stadionunda keçirir.
