26 iyun 2013 00:32
Rəvanın legionerləri gəldilər
Yeni mövsümə hazırlaşan "Rəvan” hazırlığın ilk bölümünü Bakıda keçməkdədi. Azerisport.az xəbər verir ki, çalışmalara iyunun 20-dən başlayan komanda ev oyunlarını keçirdiyi "Bayıl stadionu”nda hazırlığını davam etdirir.
Artıq futbolçular məşq ritminə düşdüyündən gündə 2 çalışma həyata keçirilir. Səhər məşqləri toplu təmrinlər üzərində qurulursa, axşam hazırlığında fiziki çalışmalara üstünlük verilir. Bu məqsədlə ötən gün komanda axşam məşqini belə desək, trenajor zalda keçdi və əzələ kütləsinin artırılması üzərində çalışdı.
Qeyd edək ki, artıq legioner futbolçular da hazırlığa qoşulub. Ötən mövsüm vurduğu qollarla komandanın "vuran ayağı”na çevrilən Xuan Manuel Varea bu baxımdan həmkarlarından fərqlənib və ilk olaraq gəlib. O, artıq komandanın 2 meydan məşqində də iştirak edib. Miloş Adamoviç isə komandaya axşam məşqində - trenajor hazırlığında qoşulub. Polşalı qapıçı Lukaş Sapela isə bəzi şəxsi məsələlərini həll etmək üçün rəhbərlikdən daha bir neçə gün icazə alıb. "1” nömrə gələn həftənin əvvəlində komandaya qoşulacaq.
