27 iyun 2013 02:04
UEFA Bakcell Arenanı yenə də tanımadı
“Neftçi” – “Skenderbeu” (Albaniya) oyununun keçiriləcəyi stadionun adı açıqlanıb. Azerisport.az xəbər verir ki, bu barədə UEFA-nın rəsmi saytında məlumat verilib.
“Neftçi” Çempionlar Liqasının ikinci təsnifat mərhələsi çərçivəsindəki ilk oyununu Premyer Liqa matçlarını keçirdiyi “Bakcell Arena”da keçirəcək. Lakin UEFA bu stadionun adını yenə də tanımayıb. Belə ki, arena “8-ci km stadionu” kimi təqdim olunub. Buna səbəb Avropa futbol qurumunun sponsor adı daşıyan stadionları tanımamasıdı.
Qeyd edək ki, “Neftçi” – “Skenderbeu” oyunu iyulun 16-da keçiriləcək. Bir həftə sonra baş tutacaq cavab matçı isə Albaniyanın Korçe şəhərindəki “Skenderbeu” stadionunda təşkil olunacaq.
