26 iyun 2013 14:35
Ukrayna yığmasının sabiq üzvü Azərbaycan klubuna keçir (FOTO)
“Rəvan” Ukrayna yığmasının sabiq üzvü Aleksandr Yatsenkonu transfer etmək istəyir. Azerisport.az xəbər verir ki, bu barədə Ukrayna mediası məlumat yayıb. Həmkarlarımızın iddiasına görə, hazırda tərəflər arasında danışıqlar gedir.
Qeyd edək ki, Yatsenkonun son iş yeri Ukraynanın “Qelios” klubu olub. O, bu ilin əvvəlində keçdiyi birinci liqa klubunda 10 oyun keçirib.
28 yaşlı müdafiəçi karyerasına 2002-ci ildə Kiyev “Dinamo”sunda başlayıb və 2007-dək əsas komandada 10 oyun keçirib. O, 2005/06 mövsümündə “Xarkov”a (37 oyun, 1 qol), 2007-də “Dnepr”ə icarəyə verilib. 2007-2010-cu illərdə Odessa “Chernomorets”ində çıxış edən (36 oyun) Yatsenko 2010-2011-ci illərdə Ukraynanın “İlliçivets” (27 oyun, 1 qol), 2012-ci ildə Belarusun “Belchina” (28 oyun, 1 qol) klublarında top qovub.
Aleksandr 2002-də Ukraynanın U-17, 2004-də U-19, 2005-də U-20, 2003-2006-da U-21 (33 oyun, 4 qol) yığmalarında çıxış edib. “Rəvan”ın istədiyi futbolçu 2004-cü ildə U-19-lar arasında Avropa çempionatında yarımfinal oynayıb, bir il sonra gənclər arasında (u-21) Dünya çempionatında çıxış edib. O, 2006-cı ildə Avropa çempionatında gümüş medal qazanan Ukrayna u-21-nin kapitanı olub.
Yatsenko Ukrayna yığmasının DÇ-2006 üçün açıqlanan heyətində zədəli Sergey Federovu əvəzləyib. Lakin Almaniyaya aparılan futbolçu DÇ-nin oyunlarında meydana çıxmayıb. Aleksandr millidəki yeganə oyununu 12 oktyabr 2005-ci ildə Yaponiyaya qarşı keçirib.
