26 iyun 2013 15:16
Xəzər Lənkəranın almaq istədiyi futbolçu AEK yolunda
Bir müddət öncə, “Xəzər Lənkəran”ın Hollandiyanın “Volendam” klubunun hücumçusu Ceyk Tuypu transfer edə biləcəyi barədə xəbər yaymışdıq. Azerisport.az xəbər verir ki, Jupiler Liqada (Hollandiyanın gücünə görə ikinci liqası) çıxış edən komandanın aparıcı forvardı dərhal bu xəbəri təkzib etmişdi.
İndi isə Hollandiya mətbuatı onun Yunanıstanın AEK klubuna keçəcəyini iddia edib. Tuypun bu klubla üç illik müqavilə imzalayacağı bildirilir.
Qeyd edək ki, 1983-cü ildə anadan olmuş Tuyp peşəkar karyerasına ilk olaraq 2003/2004 mövsümündə məhz “Volendam”da başlayıb və bu komandada keçirdiyi 46 oyunda 14 qol vurub. 2004/2005 mövsümündə isə o, “Groningen”də 11 oyuna çıxıb. 2005-ci ildə yenidən “Volendam”a qayıdan futbolçu indiyə qədər 250 oyunda 145 qola imza atıb.
