27 iyun 2013 11:09
Piastın prezidenti: Qarabağ mümkün variantlar arasında ən pisi idi
Avropa Liqasının birinci təsnifat mərhələsində üz-üzə gələcək “Qarabağ”la Makedoniyanın “Metallurg” klubu növbəti mərhələyə vəsiqə qazanacağı halda, Polşanın “Piast” komandasına rəqib olacaq. Azerisport.az xəbər verir ki, sözügedən klubun preizdenti Yaroslav Koloceyçik potensial rəqiblərini dəyərləndirib.
O, “Qarabağ”la bağlı bunları söyləyib: “Ağdamın “Qarabağ” klubu mümkün variantlar arasında ən pisi idi. Bu oyunlar zamanı Azərbaycanda 40 dərəcədən çox isti olacaq. Həm də bizi uzun və çətin yolçuluq gözləyir. Bakıya səfər təşkil etmık çox çətindi. Ona görə də biz artıq indidən Azərbaycana aviabilet axtarmağa başlamışıq, Makedoniyaya yox”.
Polşa təmsilçisinin rəhbəri Bakıdakı oyunda çoxlu azarkeşlərinin olmayacağından da narahatdı: “Makedoniyaya yollanmaq bizim üçün Azərbaycanla müqayisədə daha asan olardı. Məsələn, belə olan halda xeyli azarkeşimiz də elə maşınlarla bu oyuna baxmağa gedə və qayıda bilərdi. Amma Bakıya yollanmalı olsaq, bu, heç də asan olmayacaq və biz azarkeş dəstəyindən yararlana bilməyəcəyik”.
“Piast”ın prezidenti “Qarabağ”ın “Metallurg”u keçəcəyinə əmin olduğunu da bəyan edib: “Mən “Qarabağ”ın ikinci təsnifat mərhələsinə “Metallurg”dan daha yaxın olduğunu düşünürəm. Amma bir az səbrli olmalıyıq. Çünki futbolda heç nəyi öncədən proqnozlaşdırmaq olmur”.
