29 iyun 2013 18:15
Saturnun sabiq üzvü Bakı klubunda (FOTO)
“Rəvan” baxışa daha bir futbolçu çağırıb. Azerisport.az xəbər verir ki, baş məşqçi Ramil Əliyev Bosniya əsilli Sloveniya vətəndaşı Denis Haliloviçi sınayır.
Martda 27 yaşı tamam olan mərkəz müdafiəçisinin bir ara Bosniya və Hersoqovina millisinə dəvət alması da gündəmdə olub. Karyerasına “Rudar”da (2005-2006, 18 oyun, 3 qol) başlayan Haliloviç daha sonra vətənində “Celje” (2006-2008, 26 oyun, 2 qol) və “Drava”nın (2008-2009, 18 oyun, 1 qol) şərəfini qoruyub.
Ardından legioner həyatına başlayan müdafiəçi 2009-cu ildə Rusiya Premyer Liqasında oynayan “Saturn”a transfer olunub (2009-2011, 9 oyun, 2 qol). Növbəti mövsümü icarə əsasıyla Hollandiyanın “Willem II” klubunda (2010-2011, 16 oyun, 1 qol) keçirdikdən sonra Bolqarıstana – Sofiya CSKA-sına keçib (2011, 2 oyun).
Son mövsümdə isə o, Sloveniya çempionatının iddialı komandalarından olan “Domjale”də top qovub. Meydana çıxdığı 23 oyunda 2 qol da vuran Denis komandasının 3-cü yeri tutaraq, Avropa Liqasına vəsiqə qazanmasında yardımçı olub.
