29 iyun 2013 18:35
Rəvanın yeniləri məşqlərə başladılar
“Rəvan” yeni “futbol ili”nə hazırlığını davam etdirir. Azerisport.az xəbər verir ki, “sarı-qırmızılar” sabah AZAL-la yoldaşlıq görüşündə qüvvəsini sınayacağından bu gün məşq yüngül olub.
Buna həm də komandanın dünən fiziki cəhətdən tam yüklənməsi də təsir edib. Belə ki, “Rəvan” dünən axşam məşqini trenajor zalında keçirmişdi. Dünənki səhər çalışmasında isə ikitərəfli oyuna da vaxt ayrılıb. Bir sözlə, baş məşqçi Ramil Əliyev ilk hazırlıq matçı ərəfəsində yetirmələrini çox yormaq istəməyib.
Yeri gəlmişkən, şərti olaraq, “qırmızılar” və “yaşıllar”ın mübarizə apardığı ikitərəfli oyunda birincilər 1:0 hesabı ilə qalib gəlib və yeganə qolu debütant Ceyhun Cavadov başla vurub. Başqa sözlə, Ceyhun artıq “Rəvan”da qol hesabını açıb.
Bugünkü məşqə gəlincə, təxminən saatyarım davam edən hazırlıq toplu çalışmalar üzərində qurulub. Baş məşqçi yeni transferlərə və düşərgəyə baxışa gələn futbolçulara komandanın oyun fəlsəfəsini aşılayıb. “Kvadratlar”, təktoxunuşlu ötürmələr, qapıya zərbələr və s. kimi komponentlərin yer aldığı hazırlıqda düşərgəyə baxışa gələn daha 2 oyunçu da iştirak edib. Söhbət argentinalı pleymeyker Matias Kordoba və sloveniyalı mərkəz müdafiəçisi Denis Haliloviçdən gedir. Hər iki futbolçu ilk dəfə komanda ilə birgə “Bayıl Arena”nın qazonuna ayaq basıb. Məşq zamanı yenilərin xüsusi fəallıq göstərdiyi sezilib. Kordoba və Haliloviç daha öncə düşərgəyə təşrif buyuran Yovan Vidoviçlə Aleksandr Yatsenkodan geri qalmamağa çalışıb.
