29 iyun 2013 15:22
Böyükağa Hacıyev: Yeni gələn hücumçular Kanlesin yoxluğunu unutduracaq
Xəbər verdiyimiz kimi, “Neftçi” Avstriyadakı təlim-məşq toplanışı çərçivəsində ilk yoxlama oyununu keçirib. Azerisport.az xəbər verir ki, Rusiyanın “Volqa” klubu ilə qarşılaşan “ağ-qaralar” minimal hesablı məğlubiyyətlə üzləşib.
Oyundan sonra “Neftçi”nin baş məşqçi Böyükağa Hacıyev klubun rəsmi saytına açıqlama verib: “Təlim-məşq toplanışı çərçivəsində ilk yoxlama oyunumuz idi. Hər iki hissədə fərqli oyunçulara şans verdik. Fasilədən sonra 9 futbolçunu əvəzlədik ki, bu da nəticəyə təsirini göstərdi. Bununla belə, yoxlama oyunlarında nəticə önəm kəsb etmir. Məqsəd futbolçuların hamısına şans verib, onların hazırlıq səviyyəsini yoxlamaq idi. Bütün futbolçular səylə özlərini ən yaxşı tərəfdən göstərməyə çalışırlar. Bahodir Nasimovun əsas heyətdə yerini qaytarmaq istəməsi məni sevindirir. Əminəm ki, yeni gələn hücumçular da Nikolas Kanlesin yoxluğunu unutduracaq. İnanıram ki, Çempionlar Liqasının ikinci təsnifat mərhələsindəki ilk oyunumuzadək tam hazır olacağıq”.
Xatırladaq ki, “Neftçi” Çempionlar Liqasının ikinci təsnifat mərhələsində Albaniyanın “Skenderbeu” klubu ilə qarşılaşacaq. İlk oyun iyulun 17-də, cavab görüşü ayın 23-də baş tutacaq.
