1 iyul 2013 00:14
Neftçi yeni qapıçı transfer etdi (FOTO)
Azərbaycanı bu mövsüm də Çempionlar Liqasında təmsil edəcək “Neftçi” növbəti transferini reallaşdırıb. Azerisport.az xəbər verir ki, serb Saşa Stamenkoviçə layiqli əvəzləyici axtaran bakılılar istəyinə çatıblar.
Paytaxt klubu son iş yeri Liepaya “Metallurg”u olan Pavel Doroşevi düşərgəyə dəvət edib. Futbol azarkeşlərinin “Qəbələ”dən yaxşı tanıdığı Paşa hazırda Avstriyadadı. O, hətta Almaniyanın "Wacker Burghausen" klubu ilə yoxlama matçının ikinci hissəsində meydanda olub.
Qəbələ təmsilçisinin qapısını qoruduğu dönəmdə özü haqqında müsbət fikir formalaşdıran Latviya millisinin qolkiperi Azərbaycan çempionuna azad agent statusuyla keçib. Təcrübəli əlcək sahibi ilə yaxın günlərdə müqavilə bağlanacaq.
Qeyd edək ki, Doroşev 2012-ci ildən çıxış etdiyi Liepaya “Metallurg”unda 32 oyuna çıxıb. Pavel karyerasına 2000-ci ildə “Skonto”da başlayıb (2000-2001, 2 oyun). Daha sonra “Daugava” (2001-2002, 27 oyun), “Dinaburg” (2003, 13 oyun), “Jurmala” (2004, 17 oyun) və “Riqa”da (2004, 7 oyun) forma geyən qapıçı 2005-ci ildə “Skonto”ya dönərək 3 il doğma komandasının uğurları üçün çalışıb (50 oyun). 2009-cu ildə “Qəbələ”yə transfer olunan Pavel 2012-yədək 90 oyunda meydana çıxıb.
Doroşev Latviya millisinin üzvüdü. 2012-ci ildə ilk dəfə yığmaya çağırılan qolkiper mayın 22-də Polşa ilə baş tutan matçda debüt edib. O, yığmanın son oyununda – iyunun 7-də Bosniya və Hersoqovina ilə qarşılaşmada da heyətdə yer alıb. Bundan öncə isə Türkiyə ilə 3:3 hesabıyla bitən yoldaşlıq görüşündə baş məşqçi “çərçivə”ni Pavelə tapşırmışdı.
