1 iyul 2013 21:15
Con Toşak: Xəzər Lənkəran qrup mərhələsinə vəsiqə qazansa, mənim üçün sürpriz olmayacaq
Avropa Liqasının birinci təsnifat mərhələsi çərçivəsində sabah Maltanın “Sliema” klubunun qonağı olacaq “Xəzər Lənkəran”ın baş məşqçisi Con Toşak bu oyun öncəsi mətbuat konfransı keçirib. Azerisport.az xəbər verir ki, uelsli mütəxəssis öncə bunları söyləyib:
“Bilirik ki, çətin oyun olacaq. Özü də indi komandalar üçün heç də asan vaxt deyil. Oyunçulara daha bir neçə yoxlama matçı lazımdı ki, komandaya tam uyğunlaşa bilsinlər. Bizim isə bunun üçün yetərli vaxtımız qalmadı”.
“Bilirik ki, çətin oyun olacaq. Özü də indi komandalar üçün heç də asan vaxt deyil. Oyunçulara daha bir neçə yoxlama matçı lazımdı ki, komandaya tam uyğunlaşa bilsinlər. Bizim isə bunun üçün yetərli vaxtımız qalmadı”.
Görüşün süni örtüklü meydançada keçirilməsindən narazı qaldığını gizlətməyən Toşak eyni zamanda bunun ciddi problem yaratmayacağını bildirib: “Təbii ki, süni örtük baxımlı futbol üçün heç də yaxşı deyil. Amma biz də dünən süni örtüklü meydançada məşq etmişik. Həm də Azərbaycan klubları üçün sintetik meydança qorxulu hesab olunmamalıdı. Çünki klubların əksəri məhz belə qazonlarda oynayır”.
Toşak UEFA-nın oyunun başlama vaxtını iki gün öncəyə keçirməsinin onların hazırlıq planlarına çox ciddi təsir etdiyini də dilə gətirib: “Dediyim kimi, komandama daha bir neçə oyunu keçirmək çox vacib idi. Amma bu, alınmadı. Lakin onu da qeyd etməliyəm ki, maltalılar da eyni vəziyyətdədilər. Yəni komandaların durumu demək olar ki, bərabərdi”.
“Xəzər Lənkəran”ın çalışdırıcısı komandasının Avroliqanın qrup mərhələsinə çıxmaq şanslarından da danışıb: “Əlimizdən gələni edəcəyik ki, qrup mərhələsinə düşək. Əgər buna nail olsaq, çox sevinərik. Amma indidən hadisələri qabaqlamaq istəmirəm. Belə bir uğura imza atmaq çox çətin olacaq. Eyni zamanda onu da deməliyəm ki, “Xəzər Lənkəran” qrup mərhələsinə vəsiqə qazansa, bu, mənim üçün sürpriz olmayacaq. Mən çoxdan futboldayam və hər cür sürprizlə üzləşmişəm”.
Toşak rəqib komandadan da danışıb: “Sliema”nın öz tarixi var. Bu, heç də yeni komanda deyil. Vaxtilə mən bu komanda üzərində böyük hesablı qələbəyə imza atmışam. Peşəkar karyeramdakı son qolumu da bu kluba vurmuşam. Amma istənilən halda “Sliema”ya hörmətlə yanaşırıq. Çünki onlar Avropada böyük təcrübəyə malikdilər”.
Uelsli mütəxəssis artıq start heyətini müəyyənləşdirdiyini də söyləyib: “Demək olar ki, heyəti müəyyənləşdirmişəm. Cəmi bir-iki mövqe ilə bağlı fikrimi tam qətiləşdirməmişəm. Hələ bu barədə düşünmək üçün vaxtım var. Rəqabət böyükdü. Benuahiyə gəlincə, onun zədəsi var. Bu üzdən onun oynayıb-oynamayacağını hələ bilmirik”.
