2 iyul 2013 01:25
Simurq bir futbolçudan imtina etdi (FOTOREPORTAJ)
Kartepedə yerləşən "Green Park" otelində məskunlaşan “Simurq” hazırlıqlarını plana uyğun davam etdirməkdədi. Azerisport.az xəbər verir ki, ilk yoldaşlıq görüşünü keçirən "Simurq" ötən gün bir məşqə çıxıb.
Səhər hazırlığı əvvəlcə fitness zalda başlayıb. Bir saat fiziki hazırlıq üzrə məşqçi Aleksandr Karakliçin rəhbərliyi altında məşq edən Zaqatala təmsilçisi, daha sonra otelin meydançasına yollanıb. Uzun məsafəli qaçışdan və isinmə hərəkətlərindən sonra iki qrupa bölünüb. Yoxlama matçında 90 dəqiqə oynamış futbolçular "kvadrat"la məşqi tamamlayıblar. Digərləri isə baş məşqçi Georgi Çixradzenin rəhbərliyi altında taktiki ve texniki tapşırıqlar üzərində çalışıblar. Sonda isə qapıya zərbələr yerinə yetirilib. Bununla hazırlıq tamamlanıb və məşqçilər korpusu yetirmələrinə istirahət verib.
Komandanın düşərgəsində üç futbolçu baxışda idi. Artıq onlardan biri haqqında qərar verilib. Müdafiəçi Migel Daçelet "sarı-qaralar"ın düşərgəsindən ayrılıb. Belçikanın U-21 yığmasında da forma geyinən futbolçunun son klubu "Lers" olub.
