2 iyul 2013 17:32
İspaniya yığmasının sabiq üzvü Azərbaycan klubundan təklif alıb (FOTO)
İspaniyalı futbolçu Xisko Ximenes Azərbaycandan təklif alıb. Azerisport.az xəbər verir ki, bu barədə İspaniya mediası məlumat yayıb.
Həmkarlarımızın iddiasına görə, Ximenesə İspaniya, Almaniya və Türkiyə klubları ilə yanaşı, Azərbaycandan da dəvət gəlib. Lakin hücumçunu heyətində görmək istəyən klubumuzun adı açıqlanmır.
Qeyd edək ki, tam adı Fransisko Ximenes Texada olan 27 yaşlı hücumçu qısaca olaraq Xisko adlandırılır. Futbolun sirrlərini “Deportivo”da öyrənən Ximenes La Korunya klubunun B (2004-2006, 53 oyun, 39 qol) və A (2005-2008, 44 oyun, 12 qol) komandalarının formasını geyib. 2006/07 mövsümündə İspaniyanın “Vecindario” klubuna icarəyə verilən (27 oyun, 13 qol) forvard 2008-ci ildə İngiltərə “Newcastle”ına transfer olunub (2008-2013, 9 oyun, 1 qol). Lakin Premyer Liqa klubunda möhkəmlənə bilməyən Xisko 2009/10 mövsümündə “Racing”ə (23 oyun, 3 qol), 2011-ci ildə və 2011/12 mövsümündə “Deportivo”ya icarəyə verilib (25 oyun, 5 qol).
Ximenesin son iş yeri “Cordoba” olub. O, bu ilin əvvəlində transfer olunduğu Sequnda klubunda 14 oyun keçirib və 8 qol vurub.
Xisko İspaniya U-21-nin sabiq üzvüdü. Belə ki, o, 2007-2009-cu illərdə çağırıldığı komandada 11 oyun keçirib və 3 qol vurub.
