3 iyul 2013 14:12
Tam heyətlə ilk məşq və alqış
“Rəvan” yeni mövsümə hazırlığını davam etdirir. Azerisport.az xəbər verir ki, komanda bazar ertəsi baş tutan bərpaedici hazırlıqdan sonra yenidən “gücləndirilmiş rejimə” keçib.
Gündə 2 dəfə məşq edən futbolçular hazırlığın birinci mərhələsində olduqca istəkli görünüb. “Bayıl Arena”da baş tutan bugünkü səhər məşqi də bu baxımdan istisna olmayıb.
Baş məşqçi Ramil Əliyev axşam məşqinin trenajor-zalda olacağını nəzərə alıb, hazırlığı taktiki-texniki çalışmalar üzərində qurub. Belədə futbolçular da toplu çalışmalarla “yüklənib”. Dar sahədə pressinq tətbiq etmək, bu pressinqdən çıxmaq üzərində işləyən oyunçular ənənəvi «kvadrat» üzrə də çalışıb. Təxminən saatyarım çəkən məşqin sonunda komanda üzvləri cinah asmaları və onların qapanması, eləcə də qapıya zərbələr üzərində işləyib.
Məşqin daha bir özəlliyi onda olub ki, legionerlər tam heyətlə ilk dəfə meydana çıxıb. Belə ki, polşalı qapıçı Lukaş Sapela artıq Bakıdadı. Səhər saatlarında paytaxta dönən qolkiper yüksək peşəkarlıq nümayiş etdirərək özünü səhər məşqinə çatdırıb. Komanda üzvlərinin Lukaşın bu addımını alqışla qarşılaması da diqqət çəkib.
