4 iyul 2013 13:06
Simurqun Dila ilə oyununda nələr baş verib?
Xəbər verdiyimiz kimi, "Simurq" ötən gün Türkiyədə təşkil edilmiş təlim-məşq toplanışı çərçivəsində ikinci yoxlama görüşünü keçirib. Azerisport.az xəbər verir ki, komanda məskunlaşdığı "Green Park" otelinin meydançasında baş tutan matçda Gürcüstanın "Dila" klubu ilə qarşı-qarşıya gəlib.
Zaqatala təmsilçisi üçün ilk hissə o qədər də yaxşı keçməyib. 40-cı dəqiqədə Qori təmsilçisi hesabda irəli çıxıb. Rövşən Əmiraslanovun cərimə meydancasında rəqibə qarşı sərt oyunu görüşün baş hakimi tərəfindən penalti ilə dəyərləndirilib. İrakli Modibadze 11 metrlik cərimə zərbəsini dəqiq yerinə yetirib. İlk hissə bu hesablada başa çatıb.
Fasilədən sonra isə ssenari tamamilə dəyişib. 61-ci dəqiqədə hazırda “Simurq”un düşərgəsində baxışda olan Lukaş Bayer cərimə zərbəsini möhtəşəm yerinə yetirərək görüşdə hesabı bərabərləşdirib. Qoldan beş dəqiqə sonra çexiyalı futbolçu yenidən diqqət mərkəzinə düşüb. Salif Ballodan cərimə meydançasında gözəl ötürmə alan yarımmüdafiəçi güclü zərbə ilə yenidən topu doqquzluğa göndərib. Görüşdə irəli çıxan Zaqatala klubu 76-ci dəqiqədə qapısında yenidən qol görüb. Müdafiə xəttində buraxılan səhvdən istifadə edən Modibadze dubla imza atıb. İrakli 7 dəqiqə sonra isə komandasının 3-cü qolunu vuraraq "Dila"nı hesabda irəli çıxarıb.
Ancaq bu qarşılaşmada sonuncu qol olmayıb. Bütün gücü ilə hücuma keçən "Simurq" 90+3-də hesabı bərabərləşdirib. Cərimə meydançasında rəqibin kobud oyunundan sonra referi penalti nöqtəsini göstərib. Tagim Novruzov bunu dəqiq yerinə yetirərək oyunun nəticəsini müəyyənləşdirib və görüş 3:3 hesabı ilə başa çatıb.
“Simurq” növbəti yoldaşlıq oyununu iyulun 7-də keçirəcək. Bundan sonra komanda hazırlığın ikinci mərhələsini başa vuraraq ölkəyə qayıdacaq. (klub saytı)
