4 iyul 2013 13:45
Azərbaycan bir pillə irəlilədi
FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni açıqlanan siyahıda cəmi bir pillə irəliləyib.
Belə ki, Berti Foqtsun çalışdırdığı komandamız indi 117-ci pillədə qərarlaşıb. Komandamızın hesabında hazırda 298 (ötən ay 291 idi – azerisport.az) reytinq xalı var. Yəni, ötən ayla müqayisədə millimizin həm reytinq xalında, həm də qərarlaşdığı pillədə yaxşıya doğru cüzi də olsa, dəyişiklik nəzərə çarpır.
DÇ-2014-ün seçmə mərhələsində yığmamızın rəqiblərindən olan komandalar arasında yalnız Lüksemburqu qabaqlayırıq. Bu komanda dörd pillə irəliləyib və hazırda 210 xalla 141-ci yerdə gedir. Şimali İrlandiya 5 pillə irəliləyib. İrlandlar hazırda 307 xalla yığmamızdan altı pillə öndə - 117-ci sırada qərarlaşıblar. Bir pillə geriləyən Portuqaliya 1099 xalla yeddinci sıradadı. Rusiya altı pillə geriləyərək 979 xalla 17-ci yerdədi. İsrail də 2 pillə geriləyib. Bu ölkənin millisi 540 xalla 64-cü yerdə gedir.
Reytinq siyahısının ilk onluğunda isə vəziyyət belədi: 1. İspaniya (1532 xal), 2. Almaniya (1273), 3. Kolumbiya (1206), 4. Argentina (1204), 5. Hollandiya (1180), 6. İtaliya (1142), 7. Portuqaliya (1099), 8. Xorvatiya (1098), 9. Braziliya (1095), 10. Belçika (1079).
Qeyd edək ki, növbəti reytinq cədvəli avqustun 8-də açıqlanacaq.
