4 iyul 2013 15:26
Xəzər Lənkəranın zədəliləri cavab matçında oynaya biləcək
“Xəzər Lənkəran” Avropa Liqasının birinci təsnifat mərhələsi çərçivəsində Malta “Sliema”sı ilə cavab oyununa hazırlıqları davam etdirir. Azerisport.az xəbər verir ki, “ağ-yaşıllar” bu komanda ilə səfərdəki ilk oyundan sonra hazırlıqları elə Maltada davam etdirməyə qərar verib.
Bu həftənin sonuna kimi sözügedən ölkədə hazırlıq keçib, yerli “Birkirkara” ilə yoxlama matçı da keçirməyi planlaşdıran Con Toşakın komandasında zədəlilərin durumu hələ tam dəqiqləşməyib.
Qeyd edək ki, bu oyunda Junior Nildo, Vanderson Skarduelli və Zohair Benuahi zədələnərək sıradan çıxmışdı. Amma onlar böyük ehtimalla cavab matçında oynayacaqlar. Klubun tibb korpusu onların mümkün qədər tez bir zamanda sıraya dönməsi üçün çalışır.
Xatırladaq ki, “Xəzər Lənkəran”ın “Sliema” ilə ilk oyunu 1:1 hesabıyla başa çatıb. Cavab görüşü iyulun 11-də Lənkəranda keçiriləcək və saat 20:00-da start götürəcək.
