5 iyul 2013 12:43
Simurqun Türkiyə toplanışına davam (FOTOREPORTAJ)
"Simurq" 2013/14-cü il mövsümünə hazırlıqları davam etdirməkdədi. Azerisport.az xəbər verir ki, təlim-məşq toplanışının ikinci mərhələsi üçün iyunun 23-dən Kartepedə olan komanda ötən gün iki məşqə çıxıb.
Bir gün öncə "Dila" ilə yoldaşlıq görüşü keçirdiyinidən Georgi Çixradze yetirmələrini çox yormayıb. Səhər hazırlığı qısa məsafəli qaçış və isinmə hərəkətləri ilə başlayıb. Daha sonra Qori təmsilçisi ilə görüşdə 90 dəqiqə meydançada olan futbolçular məşqi "kvadrat" oynamaqla tamamlayıb. Digərləri isə qısa ötürmələr üzərində işlədikdən sonra, ikitərəfli oyun və qapıya zərbələrlə səhər çalışmasını tamamlayıb.
Axşam məşqində isə Georgi Çixradze yoldaşlıq görüşündə forma geyinmiş futbolçulara istirahət verib. Əvəzləmədən görüşə çıxan və forma geyinməyənlər isə hazırlıqda iştirak edib. Axşam çalışması da qaçış və isinmə hərəkətləri ilə başlayıb. Daha sonra "kvadrat" və kiçik qapılarda ikitərəfli oyunla məşqi tamamlayıblar.
Komandanın məşqlərini klub prezidenti Anar Bəkirov da yaxından izləyib. Kartepeyə gələn Bəkirov "Dila" ilə keçirilən yoldaşlıq görüşünə də tamaşa edib.
