5 iyul 2013 15:58
Rail Məlikov adam vurdu, 100 min avro ödədi!
Türkiyə mətbuatı futbol üzrə Azərbaycan yığmasının sabiq müdafiəçisi Rail Məlikovun “Denizlispor”u “Qəbələ”yə dəyişməsinin qaranlıq tərəflərini açıqlayıb. Azerisport.az xəbər verir ki, sən demə bu gözlənilməz transferin arxasında çox maraqlı məqamlar dayanırmış.
Belə ki, qardaş ölkə mətbuatının iddiasına görə, Rail bu yay istirahəti zamanı Bakıda olarkən maşınla adam vurub. Hadisə iki həftə öncə olub. Qəza zamanı bir şəxs ağır yaralanıb. Yaralının yaxınları Məlikovun istintaqa cəlb olunmaması üçün ondan 100 min avro tələb ediblər. Rail də öz növbəsində “Denizlispor” rəhbərliyindən kömək istəyib. Lakin Türkiyə klubu onun bu istəyini yerinə yetirə bilməyəcəyini bildirib. Bu zaman məsələyə müdaxilə edən “Qəbələ” Məlikovun bu borcunu ödəməyə hazır olduğunu bildirib.
Nəticədə qəzada yaralanan şəxsə 100 min avro ödəyən futbolçu “Qəbələ”nin transfer təklifini də qəbul edib. Türkiyə klubunun təzminatı isə sadəcə Railə olan borcların silinməsi sayəsində ödənilib. Baxmayaraq ki, Rail özü saytımıza müsahibəsində “Denizlispor”a əlavə pul ödənildiyini də bildirir.
Daha bir maraqlı məqam tərəflərin neçə illik müqavilə bağlaması ilə bağlıdı. Türkiyə mətbuatı Railin “Qəbələ” ilə iki illik anlaşdığını yazır. Klubdan isə israrla bildirirlər ki, bir illik müqavilə bağlayıblar.
