7 iyul 2013 18:45
Neftçi stadionunu İnterin xidmətinə verdi
Məlum olduğu kimi, iyulun 4-də UEFA Avropa Liqasının birinci təsnifat mərhələsi çərçivəsində “İnter” Finlandiyanın “Mariehamn” komandasını qəbul etmişdi. Azerisport.az xəbər verir ki, 1:1 hesabıyla başa çatmış oyunun sonrakı günü Kaxaber Sxadadzenin yetirmələri bərpa məşqinə çıxmışdılar.
Dünən komandaya istirahət verilmişdi. Bu gün isə “İnter” “Mariehamn”la oyunun hazırlıqlarına başlayıb. "Mariehamn" - "İnter" görüşü təbii örtüklü meydanda keçiriləcəyinə görə, komanda da bu matçın hazırlığını məhz təbii örtüklü meydanda keçirilməsini lazım bilib.
Bu səbəbdən “İnter” "Neftçi"yə və şəxsən klubun prezidenti Sadıq Sadıqova müraciət edib. Ondan "Mariehamn"la cavab görüşünün hazırlıqlarını İsmət Qayıbov adına stadionda keçmək xahiş olunub. Nəticədə qarşı tərəf bu xahişə müsbət cavab verib. Bu gün axşam saatlarında baş tutacaq məşq məhz İsmət Qayıbov adına arenada baş tutacaqş
Qeyd edək ki, "Mariehamn" - "İnter" matçı iyulun 11-də keçiriləcək.
