7 iyul 2013 12:15
Simurqun Türkiyədəki son məşqi (FOTOREPORTAJ)
Təlim-məşq toplanışının ikinci mərhələsi üçün Kartepedə olan "Simurq" məşqlərini tamamlayıb. Azerisport.az xəbər verir ki, 2013/14-cü il mövsümünə hazırlışan komanda ötən gün əsasən taktiki və texniki tapşırıqlar üzərində çalışıb.
Səhər məşqi isinmə hərəkətlərindən sonra iki qrupa bölünərək "kvadrat" oynanılıb. Daha sonra isə topla kollektiv müdafiə və hücumların təşkili ilə bağlı tapşırıqlar yerinə yetirilib. Hazırlığın sonunda isə futbolçular mövqelərinə görə bölünərək taktiki çalışmalar üzərində işləyib. Axşam məşqi isə son oyuna hazırlıq məqsədi daşıyıb. İsinmə hərəkətlərindən sonra hazırlıq "kvadrat"la davam edib. Daha sonra isə qısa ötürmələr üzərində məşq edilib. Sonda isə ikitərəfli oyunla son hazırlıq prosesi tamamlanıb.
Qeyd edək ki, bu, "Simurq"un Kartepedəki sonuncu məşqi olub. Komanda bu gün keçiriləcək yoldaşlıq görüşündən sonra təlim-məşq toplanışının ikinci mərhələsini də başa vurub, ayın 8-də səhər saatlarında Bakıya yola düşəcək.
