7 iyul 2013 12:40
Xəzər Lənkəranın Birkirkara ilə oyununda nələr baş verdi?
Xəbər verdiyimiz kimi, tötən gün “Xəzər Lənkəran” hazırlıq müddətində ikinci yoxlama oyununa çıxıb. Azerisport.az xəbər verir ki, Con Toşakın komandası Malta çempionu “Birkirkara” klubu ilə gücünü sınayıb. Yerli vaxtla saat 19:00-da start götürən matç “Sirens” stadionunun süni qazonunda baş tutub.
“Xəzər Lənkəran” aşağıdakı start heyəti ilə meydan çıxıb:
Orxan Sadıqlı, Rasim Ramaldanov, Alvaro Silva, Elnur Allahverdiyev, Eder Bonfim, Uğur Pamuk, Rahid Əmirquliyev (k), Marin Orsuliç, Nikola Qliqorov, Adrian Pit, Kazım Kazımlı.
Matça daha fəal başlayan “Xəzər Lənkəran” dəqiq ötürmələr hesabına topa hakim olan tərəf idi. Komanda xüsusilə cinahlardan hücumlar qurmaqla rəqib qapısı önünə ardıcıl hücumlar təşkil edirdi. Yalnız matçın 10-cu dəqiqəsində rəqib cərimə meydançasına daxil olmaq imkanı qazandı ki, qapıya ünvanlanan qüvvətli zərbəni Orxan Sadıqlı dəf etməyi bacardı. Səkkiz dəqiqə sonra Malta çempionunun qapıçısı diqqət mərkəzinə düşdü. Uğur Pamukun qüvvətli zərbəsini son anda qolkiper barmaqlarının ucu ilə toxunub kornerə çıxarmaqla tribunalara toplaşan 700-ə yaxın azarkeşin alqışını qazandı. Meydanda dominantlıq edən “Xəzər Lənkəran” daha bir qol şansını Kazım Kazımlı ilə qazandı. Lakin gənc futbolçunun zərbəsi qapıdan azca aralı keçdi. Daha çox müdafiə olunmağa məcbur qalan “Birkirkara” oyunda ilk korneri 35-ci dəqiqədə qazandı. Lakin yenə də maltalılar təhlükəli vəziyyət yarada bilmədilər ki, bu yerdə müdafiədə xüsusilə Ramaldanovun dəqiq oyununu qeyd etmək yerinə düşər. Komandalar fasiləyə qolsuz bərabərliklə yollandılar. İkinci hissəyə XL bir əvəzetmə ilə başladı. Kazımlını digər gənc futbolçu Elnur Cəfərov əvəzlədi. Sağ cinahda fəallığı ilə seçilən Uğur Pamukun uzun reydini Rahid tamamlamaq istəsə də, müdafiəçilər vaxtında müdaxilə edib topu kornerə çıxardılar. “Birkirkara” matçın 50-ci dəqiqəsində ən real qol vəziyyətini yaratsa da Orxan dəqiq oynadı. Nəhayət 65-ci dəqiqədə hesab açıldı. Pitin rəqibin cərimə meydançası daxilində ötürməsinə rəqib futbolçu əli ilə toxununca hakim tərəddüd etmədən penalti nöqtəsini göstərdi. Orsuliç dəqiq zərbə ilə “Xəzər Lənkəran”ı önə keçirdi. Matçın sonuna 15 dəqiqə qalmış Əmirquliyevi Elnur Abdullayev əvəzlədi və bu dəyişiklik sonuncu dəyişiklik oldu. Məğlubiyyətlə barışmaq istəməyən maltalılar hücumlarının kəsərini artırsa da, real təhlükə yaratmaqda çətinlik çəkirdi. Bununla belə 77-ci dəqiqədə qapıya tuşlanan zərbə cənubluların öz oyunçusuna toxunub toru silkələməkdə rəqibə yardımçı oldu. Son dəqiqələrdə “Xəzər Lənkəran” hesabda önə keçmək imkanı qazansa da, bəxt “Birkirkara”nın yanında oldu. Pamukun zərbəsi qapı tirinə dəyib auta çıxdı. Matç elə bu hesabla da baş çatdı – 1:1. (klub saytı)
