8 iyul 2013 16:09
Denizlispor Azərbaycandan indi də hücumçu alır
Türkiyənin “Denizlispor” klubu yeni mövsümün hazırlıqlarını davam etdirir. Azerisport.az xəbər verir ki, PTT Birinci Liqa təmsilçisi ölkəmizdən daha bir futbolçuya elçi düşüb.
Türkiyə mediasının məlumatına görə, “Denizlispor” “Qəbələ”nin forvardı Viktor Mendini heyətinə qatmaq istəyir. “Manisaspor”lu Kahe ilə danışıqlardan müsbət nəticə almayan klub rəhbərliyi gözünü seneqallı forvarda dikib.
Transfer çalışmaları ilə bağlı açıqlama verən “Dənizlispor”un prezidenti Süleyman Urkay “bir çox futbolçu ilə danışıqlarımız davam edir. “Dənizlispor”a yaraşan bir heyət quracağıq. Bundan kimsənin şübhəsi olmasın. Yaxın 1 həftə ərzində bəzi oyunçularla anlaşacağımızı gözləyirəm” deyib.
Qeyd edək ki, Rail Məlikovun ayrıldığı “Denizlispor”da hazırda Arif İsayev çıxış eidb. Millimizin sabiq üzvü Saşa Yunisoğlu isə bu gün “Sumqayıt”la müqaviləsini pozaraq Dənizli klubu ilə danışıqlar aparmaq üçün Türkiyəyə yollanıb. Böyük ehtimalla Saşa da bu klubla müqavilə imzalayacaq.
2011-ci ildən ölkəmizdə çıxış edən Mendi 51 oyunda 14 qol vurub. Onu bu yay sabiq klubu “Bucsaspor” da heyətinə qatmaq istəyirdi. Lakin keçid baş tutmadı.
