11 iyul 2013 22:46
Con Toşak: Xəzər Lənkəran tam hazır deyil
“Xəzər Lənkəran”ın baş məşqçisi Con Toşak Avropa Liqasının birinci təsnifat mərhələsi çərçivəsində Maltanın “Sliema” klubuna qarşı keçirilmiş cavab oyundan sonra fikirlərini açıqlayıb. Azerisport.az xəbər verir ki, uelsli mütəxəssis 1:0 hesabıyla qələbə qazandıqları görüşdən sonra öncə bunları dilə gətirib:
“Təsəvvür etdiyimiz kimi, oyun çətin alındı. Mövsümün əvvəlindəki oyunlar həmişə ağır olur. Rəqib sonadək mübarizə apardı. Birinci hissədə 4-5 qol vura bilərdik. Elə təkcə Nildo bir neçə qol vəziyyətini boşa verdi”.
Toşak Elnur Abdullayevin qırmızı vərəqə almasına da toxunub: “Maraqlıdı ki, qırmızı vərəqələri ancaq yerli futbolçularımız alır. Bu barədə düşünmək lazımdı”.
Uelsli mütəxəssis minimal hesabla qalib gəlsələr də, nəticədən razı olduğunu söyləyib: “Etiraf edim ki, nəticədən razıyam. Bax buna görə də üzüm gülür. Düzdü, 1:0 hesabı riskli idi. Buna görə uşaqların növbəti qolu da vuracağını gözləyirdim. Çünki ilk oyundakı nəticə təkrarlaan bilərdi”.
Toşak onu da etiraf edib ki, onun komandası hələ tam hazır deyil: “Komandamın çox qol vura bilməməsinin səbəblərindən biri odu ki, biz hələ hazır deyilik. Bizim qarşıda daha bir həftəmiz var. “Maccabi” (Hayfa, İsrail) ilə oyunlarda daha yaxşı çıxış etmək istəyirik”.
