14 iyul 2013 11:01
Qəbələ Antalyaspora qarşı (FOTOREPORTAJ)
Xəbər verdiyimiz kimi, "Qəbələ" Türkiyədə 4-cü - son yoxlama oyununu keçirməklə Sparta toplanışına yekun vurub. Azerisport.az xəbər verir ki, daha öncə "Metallurg" (Zaparojye, Ukrayna, 1:1), "Trabzonspor" (0:2) və "Spartaspor"la (7:0) qarşılaşan "qırmızı-qaralar" son matçda "Antalyaspor"la münasibətlərini aydınlaşdırıb. "Qəbələ" Türkiyə təmsilçisinə qarşı aşağıdakı heyətlə mübarizə aparıb:
David Petrkeviç, Ürfan Abbasov (Sadiq Quliyev), Omar Kalabane, Vladimir Levin (Deyan Kelhar), Rail Məlikov, İbrahima Niasse, Lorenzo Ebesilio (Viktor Mendi), Nuran Qurbanov (Nizami Hacıyev), Dodo (Assis), Daniel Subotiç (Leonardo), Yannik Kamanan (Abdulvahid Afolabi).
Matçın startı tərəflərin kəşfiyyat xarakterli hücumları ilə yadda qalıb. Qarşılaşmanın ilk 20 dəqiqəsində komandalar təhlükəli epizod yaratmaqda çətinlik çəksələr də, 23-cü dəqiqədə hesab açılıb. Zeki Yıldırım "Antalyaspor"u önə çıxarıb. Qoldan sonra fəallaşan Yuri Syominin yetirmələri 32-ci dəqiqədə cavab qolunu vurmağa müvəffəq olublar. Lorenzo Ebesilio dəqiq və qüvvətli zərbə ilə qapıçıya şans verməyib - 1:1.
İkinci hissəyə fərqli heyətlə çıxan Türkiyə təmsilçisi 51-ci dəqiqədə yenidən hesabı öz xeyrinə dəyişib. Tita fərqlənib - 1:2. Ruhdan düşməyən "Qəbələ" cəmi 9 dəqiqə sonra yenidən rəqib qapısına yol tapıb. Ebesilio gözəl zərbə ilə dublunu rəsmiləşdirib - 2:2. Bu matçda qeydə alınan son qol olub və "Qəbələ" Türkiyədə keçirdiyi son yoxlama oyunundan sülhlə ayrılıb.
