14 iyul 2013 12:27
Xəzər Lənkəran İsrailə buraxılmaya bilər
Xəbər verdiyimiz kimi, “Xəzər Lənkəran” bu gün UEFA Avropa Liqasının ikinci təsnifat mərhələsinin İsrail “Maccabi”si (Hayfa) ilə ilk oyununda iştirak etmək məqsədilə səfərə yollanacaq. Azerisport.az xəbər verir ki, “ağ-yaşıllar” vacib görüşə daha yaxşı hazırlaşmaq üçün İsrailə məhz indi getməyə qərar verib.
Komanda Bakı vaxtı ilə saat 19:00-da Bakı-Təl Əviv reysi ilə yola düşəcək. Lənkəran təmsilçisi yerli vaxtla saat 20:30-da İsrail paytaxtında olmalıdı. Bundan sonra komanda avtobusla matçın keçiriləcəyi Hayfa şəhərinə yollanaraq və “Dan Panorama” otelində məskunlaşacaq.
Lakin “Xəzər Lənkəran” İsraildə problemlə üzləşə bilər. Məsələ burasındadı ki, komandamızın üzvlərinə viza verilməsində problemlər yaranıb. Buna İsraildəki tətillər səbəb göstərilir. Artıq klub rəhbərliyi problemin yoluna qoyulması üçün İsrail Futbol Federasiyasına müraciət edib. İFF isə öz növbəsində ölkənin Daxili İşlər Nazirliyi ilə əlaqə yaradıb. Problemin həlli üçün bütün aidiyyatı orqanlarla danışıqlar davam etdirilir.
Qeyd edək ki, İsrailin Bakıda səfirliyi olsa da, bu ölkənin Xarici İşlər Nazirliyi onlara viza verilməsi xidmətini qadağan edib. Rusiya, Ukrayna, Belarus və daha bir neçə ölkədəki İsrail səfirlikləri də viza vermək hüququndan məhrumdu. “Xəzər Lənkəran”ın da belə bir problemlə üzləşməsi məhz ölkəmizdəki İsrail səfirliyinin bu xidmətdən boyun qaçırması göstərilir. Daha bir versiya isə İsrail səfirliyinin işçilərinin də hazırda istirahətdə olmasıdı.
Maraq üçün bildirək ki, qarşılaşmadan öncə keçiriləcək məşqdən əlavə Con Toşakın rəhbərlik etdiyi heyətin İsraildə daha üç məşq keçirməsi nəzərdə tutulur. Məşqlərin 15 iyul yerli vaxtla saat 10:00-da, həmçinin 16 iyul saat 10:00 və 18:00-da baş tutması planlaşdırılır. Lakin viza problemi vaxtında yoluna qoyulmasa, mümkündü ki, “ağ-yaşıllar”ın planları da pozulsun.
