15 iyul 2013 11:38
Simurqun Avstriyada 2-ci məşq günü (FOTOREPORTAJ)
Avstriyada təlim-məşq toplanışının üçüncü mərhələsinə start verən "Simurq" ötən gün hazırlığı iki məşqlə davam etdirib. Azerisport.az xəbər verir ki, Georgi Çixradzenin yetirmələri səhər hazırlığına fitness zalda başlayıb.
Fiziki hazırlıq üzrə məşqçi Aleksandr Karakliçin rəhbərliyi altında müxtəlif tapşırıqları yerinə yetirən futbolçular daha sonra "Kayzer" otelinin meydançasında məşqi davam etdirib. Burada gürcü mütəxəssis yetirmələrini fiziki testdən keçirib. Sonda isə "kvadrat" və qapıya zərbələrlə səhər məşqi tamamlanıb.
Axşam saatlarında komanda növbəti hazırlıq prosesinə çıxıb. Baş məşqçi Georgi Çixradzenin rəhbərliyi altında keçirilən məşq saat yarım davam edib. Səhər hazırlığından fərqli olaraq bu dəfə Zaqatala təmsilçisi əsasən taktiki təmrinlərdən ibarət tapşırıqlar üzərində işləyib. Toplu çalışmalar isinmə hərəkətləri ilə başlayıb. Daha sonra komanda topu qısa məsafələrə ötürmə və iki qrup şəklində taktiki təmrinləri yerinə yetirib. Məşq prosesi taktiki gedişlər və qapıya zərbələrlə davam edib. Sonda isə ikitərəfli oyunla hazırlıq tamamlanıb.
Məşqçilər korpusunun hazırlıq çərçivəsində tərtib etdiyi intensiv məşq qrafiki bu gün də davam edəcək.
