15 iyul 2013 12:55
Qarabağın rəqibi Bakıya gəlməkdən qorxur
“Qarabağ”ın Avropa Liqasının ikinci təsnifat mərhələsindəki rəqibi olan Polşanın “Piast” klubu Bakıya səfərinin tarixini hələ də tam dəqiqləşdirməyib. Azerisport.az xəbər verir ki, Qlivitse təmsilçisi Azərbaycana öncə oyundan iki gün əvvəl gəlməyi planlaşdırsa da, indi də elə oyun günü – iyulun 18-də uçmağı nəzərdən keçirir.
Bu barədə klubun prezidenti Yaroslav Kolodzeyçuk məlumat verib: “Bizim hələ bu variantlardan hansının daha yaxşı olduğunu düşünmək üçün vaxtımız var. İki variantı nəzərdən keçiririk. Ya oyuna iki gün öncədən səfərə çıxıb, yerli iqlimə uyğunlaşmağa çalışmalıyıq, ya da oyun günü səhər gedib, qarşılaşmadan dərhal sonra Polşaya qayıtmalıyıq”.
Klub rəhbəri Azərbaycanda ehtiyatlandıqları məqamları da açıqlayıb: “İlk növbədə orda futbolçularımız üçün heç də xoş olmayan iqlim mövcuddu. Temperatur çox yüksəkdi və oyun günü də elə olacaq. Bu, komandamız üçün çox pis təzyiq olacaq. Bu yaxınlarda mən özüm də işlərimlə əlaqədar Bakıda olmuşdum. Yaxşı oteldə qalmışdım. Fikrimcə, fərqli iqlimdə yaşayan insanlar üçün Azərbaycanda uzun müddət qalmaq çox çətindi. Bu, komandamıza da əlavə çətinliklər yaradacaq”.
Kolodzeyçuk Azərbaycan mətbəxini də səbəb kimi qabardıb. Polşalılar mətbəximizdən çox şikayətlidilər: “Biz bu məsələ ilə bağlı Polşa yığmasının sabiq baş məşqçisi Leo Beenhakkerlə də söhbətləşmişik. Polşa millisi seçmə mərhələ çərçivəsində Azərbaycanla səfər oyunu zamanı bir neçə futbolçusunu məhz yerli mətbəxdən qidalandığı üçün itirmişdi. Daha dəqiqi Azərbaycan salatından problem yaranmışdı. Biz də bundan çəkinirik”.
Komandanın baş məşqçisi Marçin Broş da bu vəziyyətdən narahatlığını dilə gətirib: “Klub rəhbərliyinin görüşü nəzərdə tutulub. Bu tədbirdə Azərbaycana səfərlə bağlı yekun qərar qəbul olunacaq. Təəsssüf ki, hələ də qərara gələ bilməmişik.Amma bizim düşünmək üçün vaxtımız var”.
