15 iyul 2013 15:30
Xəzər Lənkəran Hayfaya problemsiz çatdı, ilk məşqə çıxdı (FOTOREPORTAJ)
“Xəzər Lənkəran” UEFA Avropa Liqasının ikinci təsnifat mərhələsinin ilk oyununda iştirak etmək üçün İsrailə yollanıb. Azerisport.az xəbər verir ki, ötən axşam Bakı vaxtı ilə saat 19:15 də Bakı-Təl-Əviv aviareysi ilə İsrailə yollanan “Xəzər Lənkəran” 3 saat 10 dəqiqəlik rahat uçuşdan sonra İsrailin “Ben Qurion” hava limanına enib.
Burada komandamız maraqlı mənzərənin şahidi olub. Belə ki, iki il bundan öncə baş verənlərdən fərqli olaraq, Azərbaycan təmsilçisi çox gözəl qarşılanıb.
Hava limanında “Xəzər Lənkəran”ın heyətinin pasport buraxılış məntəqəsindən rahat keçməsi üçün ayrıca 4 məntəqə ayrılıb. Komandamız daha sonra ev sahibi komanda tərəfindən ayrılmış avtobusla polis muşaiyəti ilə məskunlaşacağı otelə - “Dan Panorama Hayfa”ya yollanıb.
Bu gün isə səhər saatlarında “Xəzər Lənkəran” Hayfada “Maccabi” (Hayfa) klubunun aşağı yaş qruplarının” Kezef” adlanan bazasında ilk məşqinə çıxıb. Saat yarım davam edən məşqdə futbolçular taktiki çalışmaları yerinə yetiriblər.Hazırda düşərgədə zədəli futbolçu yoxdu və komanda tam heyətlə hazırlığını davam etdirir.
Sabah isə “Xəzər Lənkəran” səhər və axşam olmaqla iki məşqə çıxacaq. (klub saytı)
