16 iyul 2013 20:34
“Neftçinin uğuru ötən ildə qalıb”
Albaniyanın “Skenderbeu” klubunun baş məşqçisi Mirel Yosa Çempionlar Liqasının ikinci təsnifat mərhələsinin “Neftçi” ilə ilk oyunu öncəsi fikirlərini açıqlayıb. Azerisport.az xəbər verir ki, o, bu gün Bakıda təşkil olunan mətbuat konfransında öncə bunları söyləyib:
“Bu, həm bizim, həm də Albaniya futbolu üçün çox vacib oyundu. Son üç ildə ölkə çempionu oluruq. Bu mövsüm avrokuboklarda da uğur qazanmaq, mərhələ keçmək istəyirik. Başa düşürük ki, asan olmayacaq. Amma biz “Neftçi”dən də güclü komandalara qarşı oynamışıq. Avstriya toplanışı zamanı komandanızın oyunlarını görmüşük. Amma mənə elə gəlir ki, sabah “Neftçi” tamamilə fərqli futbol nümayiş etdirəcək”.
Yosa komandamızın heyətində bir neçə futbolçunu fərqləndirib: “Rəşad Sadiqov güclü futbolçudu. Belə oyunçulardan çəkinmək lazımdı. Araz Abdullayev, Julius Vobay, Bahodir Nasimov da az təhlükəli deyil. Klubunuzun öz oyun üslubu var. Amma mən öz futbolçularıma güvənirəm”.
Lakin “Skenderbeu”nun çalışdırıcısı “Neftçi”dən çəkinmədiklərini iddia edib: “Biz Azərbaycan çempionundan qorxmuruq. Ona görə də sabahkı oyunda qorxaq futbol sərgiləyəcəyimizi gözləməyin. Başa düşürük ki, tribunalar da bizə qarşı olacaq. Amma biz öz futbolumuzu sərgiləməyə və Albaniyaya yaxşı nəticə ilə qayıtmağa çalışacağıq. Düzdü, hər iki oyun çətin olacaq. Hələlik isə bütün diqqətimiz ilk oyuna yönəlib. Baxaq, görək Bakıda necə alınacaq. Sonra evdə necə oynamaq barədə düşünərik. Əgər burda uğur qazana bilsək, evdə daha çətin olacaq. Çünki “Neftçi”nin səfərdə necə oynadığını bilirik. Milanda “İnter”lə he-heçəni yaxşı xatırlayıram”.
Albaniyalı mütəxəssisin sözlərinə görə, belə oyunlarda təcrübə çox vacibdi: “Neftçi”nin bizi təzyiq altında saxlayacağına şübhə etmirəm. Amma müdafiədə oturmaq fikrimiz yoxdu. Hücum edəcəyik. Çünki müdafiədə otursaq, işimiz daha çətin olacaq. Belə oyunlarda təcrübə çox vacibdi. Komandanız bu baxımdan bizdən daha təcrübəlidi. Son avrokuboklar mövsümündə böyük uğur qazanıblar. Amma onların bu uğuru ötən mövsümdə qalıb”.
