16 iyul 2013 13:09
Xəzər Lənkəranın rəqibi Nilsson və Rodionova göz dikib
İsrailin “Maccabi” (Hayfa) klubu Avropa Liqasının ikinci təsnifat mərhələsinin “Xəzər Lənkəran”la oyunları öncəsi transfer çalışmalarını da davam etdirir. Azerisport.az xəbər verir ki, hayfalılar hazırda iki futbolçunun transfer üçün çalışır.
Bunlar isveçli Lars Nilsson və belaruslu Vitali Rodionovdu.
Qeyd edək ki, 31 yaşlı Nilsson İsveçin “Elfsborg” klubunda çıxış edir. Baş məşqçi Arik Benado bu hücumçunun komandasına çox faydalı olacağını düşünür. İsveç yığmasında da çıxış etmiş Larsın vaxtilə “Brage”, “Heerenveen“, “Saint-Etienne”, “Aalborg”, “Vitesse” kimi komandaların şərəfini qoruduğunu da vurğulayaq.
İsrail təmsilçisi Nilssonu heyətinə qata bilməsə, o zaman Rodionovun keçidini həll etməyə çalışacaq. Belarusun BATE klubunun son illərdəki uğurlarında böyük pay sahibi olan bu hücumçunu çoxdan izləyən “Maccabi”nin skautları məhz indi ona elçi düşməyə qərar veriblər. Amma 29 yaşlı forvardın bu keçidə nə dərəcədə müsbət yanaşacağı hələlik bilinmir. Hər halda Belarus millisinin aparıcı üzvünün “Xəzər Lənkəran”a qarşı forma geyməsi istisna olunmur.
Qeyd edək ki, “Xəzər Lənkəran”la “Maccabi” arasındakı ilk oyun iyulun 18-də Hayfada, cavab görüşü isə ayın 25-də Lənkəranda baş tutacaq.
