21 iyul 2013 01:09
Neftçi üzərində qələbəyə görə mükafatın məbləği artırıldı
Xəbər verdiyimiz kimi, Albaniyanın “Skenderbeu” klubunun futbolçuları UEFA Çempionlar Liqasının ikinci təsnifat mərhələsində Azərbaycan çempionu “Neftçi”yə qalib gələcəkləri halda böyük məbləğdə mükafat əldə edəcəklər. Azerisport.az xəbər verir ki, öncə “Skenderbeu”nun prezidenti Ardian Takayın komandasının “Neftçi”ni keçəcəyi halda oyunçulara 80 000 avro mükafat söz verdiyi bildirilirdi.
Lakin o, Albaniya mətbuatına son açıqlamasında komandasının daha böyük mükafat alacağını bəyan edib: “İlk oyun göstərdi ki, bizim növbəti mərhələyə çıxmaq üçün şansımız var. Mükafat gözlənilirmi? Əlbəttə. Əgər biz mərhələ keçsək, oyunçular 100 000 avro mükafat əldə edəcəklər. Bizim kifayət qədər maliyyə imkanlarımız var ki, belə mükafat təyin edək”.
Maraq üçün bildirək ki, bu komandalar arasında Bakıda keçirilmiş ilk oyun qolsuz başa çatıb. Cavab matçı iyulun 23-də Korçe şəhərində keçiriləcək.
