20 iyul 2013 15:14
Sumqayıtdan ayrılan iki futbolçu Türkiyə klublarında
Bu yay “Sumqayıt”dan ayrılan iki futbolçunun yeni iş yeri müəyyənləşib. Azerisport.az xəbər verir ki, son mövsümü Premyer Liqamızda keçirən Taner Taktak və Can Akgün karyeralarını Türkiyədə davam etdirəcək.
Belə ki, Taner Taktak PTT 1-ci liqaya vəsiqə qazanmış “Fethiyespor”a keçib. Bu barədə klubun rəsmi saytı məlumat yayıb. Maraqlıdı ki, “Fethiyespor”un saytı “Sumqayıt”ı yaddan çıxarıb. Belə ki, sayt Taneri “Belçikanın 2-ci liqasında oynayan yarımmüdafiəçi” kimi təqdim edib. Amma o, Belçikanın “Patro Eysden” klubunda “Sumqayıt”dan əvvəl – 2011/12 mövsümündə oynayıb.
Qeyd edək ki, Taner ötən mövsüm “Sumqayıt”da 20 oyuna çıxaraq 1314 dəqiqə oynayıb və 1 qola imza atıb.
Can Akgünün isə “Bayrampaşaspor”la anlaşıb. 2-ci liqa klubu artıq onunla 2 illik müqavilə bağlayıb. Bu barədə “Bayrampaşaspor”un rəsmi saytı məlumat yayıb. Qeyd edək ki, Almaniyada “Türkiyəmspor” və “Berliner AK”ın formasını geyinən Can ötən mövsüm “Sumqayıt”ın heyətində 13 oyuna çıxaraq 750 dəqiqə oynayıb və 1 qol vurub.
