25 iyul 2013 00:44
Qarabağın yeni transferi müqavilə bağlamaq üçün Bakıya gəldi
Yunanıstanın “Olimpiakos” klubunun yarımmüdafiəçisi Çumbinyo Bakıya gəlib. Azerisport.az xəbər verir ki, braziliyalı futbolçu artıq “Qarabağ”la bütün məsələlərdə razılığa gəlib.
Onun tezliklə Ağdam klubu ilə müqavilə bağlaması gözlənilir. Böyük ehtimalla bu, Avroliqanın ikinci təsnifat mərhələsi çərçivəsində Polşa “Piast”ı ilə cavab oyununa yollanan “Qarabağ” rəhbərliyinin vətənə dönüşündən sonra gerçəkləşək. Onunla iki illik müqaviləyə imza atılacaq.
Maraq üçün bildirək ki, 1986-cı ildə anadan olmuş və tam adı Marinaldo Çiçero da Silva olan Çumbinyo karyerası ərzində çoxlu klublarda çıxış edib. O, karyerasına 2005-2006-cı illərdə vətənində “Sao Paulo”da başlayıb. 2006-cı ildə Çumbinyo “America-SP” klubuna icarəyə verilib. Elə həmin il Yaponiyanın “Kashima Antlers”ində də icarə əsasında forma geymiş yarımmüdafiəçi 2007-də “Coritiba”da oynayıb. Həmin il “Ponte Preta”da da top qovmağa imkan tapan Çumbinyonu 2008-də “Rio Claro” transfer edib. 2008-2009 mövsümündə bu futbolçunu Portuqaliyanın “Leixoes” klbubu alıb. 2009-cu ildən isə Çumbinyo Yunanıstanda çıxış edir. O, bu ölkədə əvvəlcə “Ethnikos”un şərəfini qoyurub. 2010-cu ildə isə braziliyalı “Olimpiakos”la müqavilə imzalayıb. Lakin maraqlıdı ki, elə alınan gündən bu futbolçu digər klublara icarəyə verilib. Çumbinyo son illərdə “Panserraikos”, OFI, “Levadiakos” və “Atromitos”un formasını geyinib.
