25 iyul 2013 11:15
Rəvan Türkiyə klubu ilə sülh bağladı (VİDEO)
2013/14 mövsümünə hazırlıqlarını Sloveniyada davam etdirən "Rəvan” növbəti yoldaşlıq oyununu keçirib. Azerisport.az xəbər verir ki, paytaxt klubunun Avropanın adıçəkilən ölkəsindəki son görüşündə rəqibi Türkiyə Super Liqasının təmsilçisi "Karabükspor” olub.
Maraqlı mübarizə şəraitində keçən oyun heç-heçə nəticələnib – 2:2. Türkiyə elitasının nümayəndəsi ilə tam başa-baş mübarizə aparan "aslanlar” hissənin sonlarında istəyinə çatıb: 40-cı dəqiqədə Elvin Həsənəliyevin ötürməsindən sonra komandada baxışda olan Sebastyan Kastro gözəl vuruşla hesabı açıb. Fasilədən sonra yeni oyunçuların meydana çıxması oyun intizamının pozulması ilə nəticələnib və rəqib bundan istifadə edərək ard-arda 2 qol vurub. Lakin inamlı təsir bağışlayan "Rəvan” təslim olmayıb və 62-ci dəqiqədə Miloş Adamoviçlə tarazlığı bərpa edib. Bu, həm də matçda vurulan son qol olub.
Beləliklə, iyulun 26-da Bakıya qayıdacaq "Rəvan” Sloveniya toplanışı çərçivəsində dördüncü oyununu keçirmiş oldu. Daha öncə komanda Sloveniya təmsilçisi "Aluminij” (1:1) və Serbiya klubları "Donyi Srem” (0:2) və "Çukariçki” (0:0) ilə qarşılaşmışdı.
