25 iyul 2013 14:16
İnterlə Xəzər Lənkəran hə, Qarabağ yox
Avropa Liqasının ikinci təsnifat mərhələsi çərçivəsində bu gün Polşada keçiriləcək “Piast” – “Qarabağ” oyunu Azərbaycan kanallarında canlı yayımlanmayacaq. Azerisport.az xəbər verir ki, telekanallarımız Ağdam klubuna növbəti dəfə biganəlik nümayiş etdiriblər.
Qeyd edək ki, Azərbaycan dövlət televiziyası bu gün saat 21:00-da Avroliqanın “Xəzər Lənkəran” – “Maccabi” (İsrail, Hayfa), “İdman Azərbaycan” kanalı isə elə həmin saatdan “İnter” – “Tromse” (Norveç) oyununu canlı nümayiş etdirəcək. Artıq bu matçlar TV-lərin proqramına da salınıb.
“Qarabağ”ın matçı isə saat 20:30-da başlayacaq. Bu üzdən ağdamlıların oyununu yayımlamaq imkanı olmayan sözügedən kanallarla yanaşı özəl telekanallar da “Qarabağ”ın oyununu yayımlamaq istəyini bildirməyib.
Sonda onu da xatırladaq ki, "İnter"lə "Xəzər Lənkəran" ilk oyunlarında 0:2 hesabıyla uduzduğu halda, "Qarabağ" rəqibinə 2:1 hesabıyla qalib gəlmişdi.
