27 iyul 2013 00:11
Neftçi qənimini transfer edir (FOTO)
Azərbaycan çempionu “Neftçi” UEFA Çempionlar Liqasının ikinci təsnifat mərhələsində məğlub olduğu (0:0, 0:1) Albaniyanın “Skenderbeu” klubundan futbolçu almağa hazırlaşır. Azerisport.az xəbər verir ki, paytaxt klubu Korçe təmsilçisinin nigeriyalı yarımmüdafiəçisi Nurudin Orelesini sıralarına qatmaq istəyir.
Bu barədə Albaniya mətbuatı məlumat yayıb. Məlumatda bildirilir ki, Korçedəki cavab matçından sonra “Neftçi” rəsmiləri dərhal Orelesi ilə danışıq aparıblar və ona təklif irəli sürüblər. Hazırda danışıqlar başlanğıc mərhələsindədi. “Skenderbeu” rəhbərliyi isə futbolçunun Azərbaycan klubuna keçidinə problem yaratmağa hazırlaşmır və hətta onunla müqaviləni qarşılıqlı şəkildə pozmağa da hazırdılar. Qışda bu futbolçunu Ukraynanın “Krivbass” klubuna buraxmayan albanlar indi Orelesiyə azad agent statusu verməyə razıdılar.
Qeyd edək ki, Orelesi Korçedəki oyunda “Neftçi”nin qapısından keçirilən yeganə qolun müəllifidi. Məhz onun əlavə vaxtda – 115-ci dəqiqədə vurduğu qol Azərbaycan çempionunun mübarizəni ilk mərhələdəcə dayandırmasına səbəb olmuşdu.
