27 iyul 2013 01:18
Lənkəranda azarkeşlərin XL rəhbərliyinə qarşı aksiyasını polis dağıtdı
Avropa Liqasının ikinci təsnifat mərhələsində İsrailin “Maccabi” (Hayfa) klubuna öz evində biabırçı hesabla məğlub olan “Xəzər Lənkəran” klubunun rəhbərliyinə etiraz məqsədi ilə iyulun 26-da bir qrup azarkeşin “Fırtınalar meydanı” qarşısında aksiya keçirəcəyi barədə xəbər vermişdik. Azerisport.az xəbər verir ki, sözügedən etiraz aksiyası baş tutub.
Belə ki, ötən gün saat 20:00-da 50-60 nəfər azarkeş Lənkəran çayının üzərindəki körpünün şəhər tərəfində olan hissəsində toplaşaraq stadion istiqamətində hərəkətə başlayıblar. Körpünü keçməmiş bir neçə polis maşını onların qarşısını kəsib. Asayiş keşikçiləri stadiona tərəf gedən azarkeşləri dağılışmağa çağırıblar. Bu zaman toplaşan insanların əksəriyyəti dağılışıb. Fəallıq edən 4 nəfər polis və mülki geyimli şəxslər tərəfindən həbs olunaraq maşına oturdulub. Bu zaman “Sahil” restoranının çayxanasında çay içən bir nəfər də aranı sakitləşdirmək məqsədi ilə onlara yaxınlaşıb. Polis əməkdaşları təsadüfən onu da həbs ediblər.
Polis şöbəsinə çatdıqda məlum olub ki, həbs olunanlardan birinin maşında ikən burnu qanadılıb. Belə ki, şöbəyə çatdıqda həmin şəxsin əynindəki ağ köynək artıq qana bulanıbmış. Bölmədə həbs olunanların yanında polis zabitləri bir neçə dəfə müxalifətçilərin ünvanına müxtəlif söyüşlər səsləndiriblər. Buna cavab olaraq həbs olunanlar özlərinin müxalifətə heç bir aidiyyati olmadıqlarını və yalnız “Xəzər Lənkəran”ın zəif çıxışına görə klub rəhbərliyinə etiraz etmək fikrində olduqlarını bildiriblıər. Bundan sonra qanun keşikçiləri həbs olunanlarla daha səmimi söhbətə başlayıb. Söhbət əsnasında polis şöbəsində baş verənlərin mətbuata çıxarılmaması onlara məsləhət görülüb. Ardınca həbs olunan 5 nəfər haqqında ətraflı məlumatlar toplayan polis əməkdaşları axşam saat 21:40-da onları sərbəst buraxıblar. (12-ci oyunçu)
