27 iyul 2013 19:06
Simurqda hollandiyalı və serb futbolçular (FOTO)
“Simurq” Avstriya toplanışı zamanı transfer çalışmalarını da davam etdirməkdədi. Azerisport.az xəbər verir ki, dünən daha iki futbolçu "sarı-qaralar"ın düşərgəsinə qoşulub.
Bunlar serbiyalı hücumçu Draqan Çeran və hollandiyalı Cerard Aafyesdi. Hazırda komandada onlarla birlilkdə baxışda altı futbolçu var. Onlar haqqında son qərarı isə məşqçilər korpusu verəcək.
Qeyd edək ki, 1987-ci ildə anadan olan Çeran vaxtilə Serbiyanın U-21 yığmasında 3 oyuna çıxıb. O, peşəkar karyerasına yerli “Smederevo”da başlayıb. 2005-2012 mövsümləri aralığında bu komandada 129 oyunda 18 qol vuran Draqan 2006-cı ildə “Zelezniçar”da icarədə oynayıb və 6 matçda 4 qola imza atıb. 2007-ci ildə isə o, “Mladi Radnik”də icarədə olub (12 oyun, 10 qol). 2009-2010 mövsümündə isə o, Belçikanın “Westerlo” klubunda icarə əsasında 3 oyuna çıxıb. 2012-ci ildə bu futbolçunu İsrailin “Hapoel” (Haifa) klubu transfer edib. O, bu komandada 10 oyun keçirib. 2012-2013 mövsümündə isə Çeran bu ölkənin “Maccabi” (Netanya) komandasında forma geyib – 24 oyuna 7 qol.
Aafyesə gəlincə, 1985 təvəllüdlü bu futbolçu müdafiədə oynayır. 2004-2007-ci illər aralığında “Volendam”da çıxış edən Cerard 52 oyunda 2 qolla yadda qalıb. 2007-2009-cu illərdə isə o, Şotlandiyanın “Falkirk” klubunda legioner həyatı yaşayıb – 43 oyunda 1 qol. 2009-cu ildə yenidən Hollandiyaya qayıdan futbolçu 2011-ci ilədək “Maastricht” 58 oyuna 3 qol vurub. 2011-ci ildən etibarən isə “Zwolle”də 16 oyuna çıxıb.
